Wednesday 12 March 2014

Barca kuta Man City chu Champions League anthawk hnawtdawk an nih.

English club lien Manchester City chu Camp Nou ah inzinin Barcelona chu 2-1 (Agg 4-1) in an hne nawa. Champions League anthawk an tla tah. Barca ta dingin Messi le Alvez in an thuna Kompany chun City goal khat a thun. City hi kumbul tieng khan chu trophy 4 lai beisei kha an nia. Tu ruok hin chu trophy pakhat neita hai sienkhawm pakhat bak beisei ding an nei ta nawh. Capital One Cup ah an Champion zo khan FA Cup anthawkin Wigan in an pet suoka. Tun UCL anthawk an tla nawk ta a. EPL title char beisei ding an nei tah. 

1st leg a khan City chun Etihad Stadium ah 2-0 in an lo hne ta nawa. Hi lei hin goal 3 beka an hne a ngaia. Tukhawmin an hne beise ngam an um nawa. City hi a tla dinga ringsa ania. An tla ta reng bawk anih. City boss Pellegrini chu UEFA in match 3 an hremna a hmang ţana. Touchline ah um thei loin mipui inţhungna tienga inum tir a nih.

Inkhel an ţan a, City chun theitawpa nawr tumin ţhang an laka. Sienkhawm an nuom angin ball an chang thei nawh. 8mins ah Lescott in Messi box sunga a mana refree in a hmunaw chu vangneitak an nih. Barca chun chance nei sunzawm peiin Nymar goal thun chu off side leiin pawm an nawa. Nasri shot Valdes save chu 1st half a City chance ţhatak a nih. Goal lût loin 1st half a tawp.

2nd half a hin City game in hma a sawn a. Ana chu Barca hnena ding chun a huntawk nawh. Half time lai Aguero chu an hliem leiin Dzeko chun a thlaka. A hung khelţha hle. A head Valdez in a save kha chu pui tak a nih. Chance an nei insawk deu zak zaka, goal thun mamaw City chun an nawr lem deu. 67mins ah Barca chun Messi hmangin hma hung ţhuoi lem. Fabregas chun awlsam takin Lescott chu paltlangin Messi a peka. Ama hin a ke vawitiengin mawitakin a thun. 78mins ah Pique chun box sung Dzeko a kar thlu a. Penalty ngei ding ani laiin refree chun a pek nawa. Refree thutlukna hi Zabaleta chu a lungawi thei loin a protest na ah yellow card a vawihnina pek niin hnawtsuok a nih. Hi zo 89mins ah Kompany chun City goal thun vawikhatna dingin a head lûta. Ana chu hun pekbel 90+1 mins ah Dani Alves chun Barca ta dingin goal a hung thun ve nawk a. Barca chu 2-1 in an hrata. Belkhawmin 4-1 laiin hnena an chang a nih.

No comments:

Post a Comment