City chun Etihad Stadium suklienna sin an ţan vat ta ding; Arsenal in insawng bawl tuma an hnina court in a hnawl

Manchester City chun tuta inthawka sawtnawte hnunga Etihad Stadium suklienna sin thawkkhatna an ţan vat ta ding thu an puonglang. City hin tukum February thla khan Manchester City council anthawk Etihad Stadium suklienna ding phalna an lo hmu tah a. Etihad Stadium ah hin tuhin mi 47,670 anin leng meka. Suklien ani hunah mi 62,170 lai anin leng ta ding a nih.

An suklienna ding hi North and South stand ning a ta. A sin hi thâwkhnia ţhe ning a tih. Hi stadium suklienna dinga sinthawtu ding hai chu international engineering company inlâr 'Laing O'Rourke' hai an ni a. An ni hi kum 2002 a hi stadium bawltu hai tho kha an nih.

*Hienglaizing hin Arsenal chun Emirates Stadium bula insawng sawng 25 a insang bawl dinga an hnina Court chun a lo hnawl pek. Court in an hnawl nasa hi an puonglang nawa, ana chu hienglai hmun velah hin building insang tak tak bawl hi an phal bek nawh nia hril a nih.

A tir chun Local government planning inspector haiin an lo phal pek ta a. Sienkhawm court chun a lo hnawl ta a nih. Arsenal chun an insawng bawl tum hi hieng lai hmun anin tuoitharna dinga project pakhat ani thu hrilin, hi building hin midang a sukbuoi naw ding thu khawm an hrila. Court chu an thutlukna hi ngaituo ţha dingin an ngen.