Sunday 30 March 2014

Liverpool chun Tottenham hnein Premier League ah hma anţhuoi tah

Premier League title race a pui deu deu a. An points hai le game anla khel ding hai thlir chun a tawp chen anin hnawt tawl ngei ding a nih.

Liverpool chun Anfield ah Tottenham an lo mikhuola, 4-0 laia sawpin Premier League table chung takah anin hlangkai tah. Liverpool ta ding hin Younes Kabuole [OG] Luis Suarez, Coutinho le Jordan Henderson hai chun goal an thun.

Season tan hlim khan chu Liverpool hi top 4 kai kha ania an tum tak. Ana chu tuzet hin chu champion dinga mi ring pawltak an ni tah. Tun game 32 khel tain points 71 an hmu mek ta a. Chelsea le Manchester City hi Anfield ah an lan khelpui ding ana. City hi game 2 in la kheltlawm lem hai sienkhawm an game la khel ding 6 hai hi an hrat vawng chun CHAMPION an nel. Chu leiin Champion le Champion naw chu an kut lieu lieu a innghat a nih.

Hi match hi beisei dan chun game inhnetawk tak ring ania. Ana chu inkhel an ţana beisei ang an naw hle. Liverpool hin a bul anthawkin a tawp chen game hi anthunun hle a. Hi neka goal tamlem khawmin hnena chang thei ding an nih. Match ţan ani an thawk 2mins ah Younes Kabuole chun an ni tieng a pal lût pal hlau a. Liverpool chun 1-0 in hma anthruoi nghal. Hi zo 25mins ah Liverpool thiempuipa Luis Suarez chun tuta season a goal 29 na dingin goal hung thunin 2-0 in hma an thuoia Spurs hin hung nawr vein Soldado shot chu Mignolet in thratakin a save. Suarez hi Liverpool ta dinga season khatah goal thun rawntak ani meka. Goal iengzam a thun thei ding chu. . . Goal lut ta loin 1st half a tawp.

2nd half a khawm Liverpool bawkin game an thununa chance khawm an hau nawk hle. 55mins ah Coutinho chun goal hung thun ve nawkin 3-0 in hma anthruoi der tah. Liverpool hin Game an thunun sunzawm pei a 75mins ah Jordan Henderson chun goal hung thun ve nawkin Spurs beiseina a suktawp. Goal dang lut ta loin 4-0 laiin Liverpool chun hnena an chang.

Spurs ta ding hin top 4 tling a harsa ta hle a. Europa League chen khawm khel phaklo thei ngirhmu ah an um mek. An manager Tim Sherwood le Chairman Daniel Levy hai chunga khawm pressure a nasa ta hle bawk. Tuhin game 32 khel tain points 56 an hmu ta a. Parukna ah an um mek.

No comments:

Post a Comment