“Liverpool in an mi hne chieng hle” :Arsene Wenger

Goal 17 set title an inchupui hail aka insuo ta hai sien khawm, Arsenal manager Arsene Wenger chun Liverpool hin an mi hne chieng hle a la ti ṭawk chau a nih. A ni ding dingin Chelsea in 6-0 a Stamford Bridge a an sawp ṭum khan chu mi 10 chau an ni hnung ti thei a nih a, Liverpool in Anfield a 5-1 zeta an sawp ruok kha chu mi kim ṭhel ṭhawl an ni leiin zuk sawisel a harsa a.

Wenger in a hril dan chun, “Game pakhata an mi hne let der ṭum chu Liverpool a mi chau kha a nih, a dang hai chu thil ṭha naw tlung neu neu lei a nih a, Chelsea kan khel pui ṭum khan minutes 10 sung chau in game a over nghal a, Liverpool a ruok khan chu kan game kha an mi letbun der el a nih.

Chelsea le an khel ṭum khan chu mi 10 chau nihai sien khawm an game a khan an la lut ve zing a, Liverpool le an inkhel ṭum ruok khan chu game intluonin an bo let der ti theiin a um. Amiruokchu FA Cup a hung ni khan chu a boruok a dangdai nawk zat a, Liverpool an hne ban nawk der thung.

Arsenal hi team thar indin nawk mek an nih a, Patrick Viera, Pires, Henry, Berkamp, Lehmann hai an lo chuoi tah a, an player ṭha vawr tawp ṭhenkhat Febregas, Van Persie, Nasri hai an suok dawk bawk, sienkhawm Wenger hin team thar chu budget intep tak kara an din dawk nawk thei pei a, hi hi tak hi a special na pakhat chu a ni ve a nih. Ei theinghil der lo ding thil pakhat chu 2003/04 season a inthawk khan Real Madrid ti lo a chu Arsenal char hi Champions League knock out stage kai thei char char um sun  an nih.

Team hlawtlingna hi trophy chau hi annaw a, pawisa sum lamna ngirhmun le club rel bawm dan det indo  tak nei a, team ṭha tak mani tuolsung a indin dawk nawk thei pei khawm hi hlawtlingna pakhat a ni ve a nih.