Thursday 27 March 2014

Mourinho in Ibrahimovic a hawphur?





Mourinho chun Ibrahimovic in Champions League nomawi a dawm inhawkna hi Chelsea ta dinga thil hawphur um a ni a ring. Champions League quarter final a inkhel ding Chelsea le PSG hai hi Premier League le Ligue 1 a hma ṭhuoitu ve an nih a, an inhawphurtuo ve ve niin an lang.

PSG hai striker Ibrahimovic hi Mourinho hnuoi Inter Milan a khan a lo khel tah a, 2009/10 season khan Barca tieng a pan a, kha season khan Mourinho rawiin Inter chun Champions League an lak a nih. Europe a league title vawi 11 lai lo la thei tah Zlatan Ibrahimovic hin Champions League nomawi hi a la dawm ngai nawh a, hi tak hi a vangduoina pakhat chu ni ve ngei a tih.

Inkhel ding chungchang hi Mourinho chun hieng hin a hril, “ Thiago Motta, Maxwell le Ibra hai hi ka hnuoia an lo khel ta hlak a, Inter hlawtling taka ka enkawllai khan an ṭhang ve, amiruokchu Zlatan hi chu a special bik rieu a, championship tum tum a lak rawn tah a, Champions League a la laknaw lei hin a lak nuom ngei ka ring a, hi hi kan ta ding chun thil ṭi um khawm a tling hle dingin ka ring, asanchu a lak theina dingin iengkim a thaw an huom ka ring lei a nih”

Mourinho chun hril zawm peiin, “PSG hi champion thei team an ni ve a, player an nei ṭha a, Chelsea chanchin le an khel dan an ngaiven ta lei hin kan ta dingin a ṭha bek nawh, anachu Chelsea in Champions League a sulhnung kan nei ṭha a, hi hi ka ta dingin thilṭha a nih, pressure an sang nawh a, mi tam takin ka rorum ana an mi tih a, a pawi ka ti nawh, PSG le kan inkhel ding hi 50-50 in hratna chance kan nei ve ve” ti’n a hril.

PSG chun awlsam takin Ligue 1 a point 10 laiin hma an ṭhuoi mek a, Chelsea ruok chun harsa ṭang ṭang pumin Premier league a point khat ngawiin hma an ṭhuoi ve thung a, domestic league boruok hin champions league a an khel dan a suk danglam naw ding thu Mourinho hin a hrilsa bawk.

No comments:

Post a Comment