Striker thar kan mamaw tak zet: Mourinho

Inrinni zan a Selhurst Park a Crystal Palace laka muolpho tlak taka 1-0 a an tlawm hnung dar kar 24 hnunga, Chelsea chun premier league hmaṭhuoitu an nina Liverpool laka an lo inthla tah, goal an thun thei naw chau ni loin an striker hai hin goal an la thun hril ding a la tam meu nawh. Goal tam lem hai chu midfielder hai a inthawk a nih a, striker haiin premier league a goal an thun zat chu Etoó in goal 8, Torres in goal 4 le Demba Ba in goal 3 a nih.

Hi thu le inzawm hin Mourinho chu a ṭawng suok ta rek a, hieng hin a gawp rek tah a nih, “ Tu ang hun hi chu season nawk a chu…tina hun a la ni nawh a, market thu vel hrilna hun khawm a la ni bawk nawh, anachu mitin mithmu a fie em em pakhat chu Chelsea in season nawk a striker thar lak lut nuomna kan nei hi a nih.”

Mourinho chun hril zawm peiin, “Striker la um hai hmakhuo chu Striker lak lut thar hai le inel a ni el a, pangngai takin an khel dan dungzui ang peiin an chan chu ruotin um a ta, play rawn deu le play rawn naw deu chu khel ṭhat dan dungzui pei a nih. Team ṭha ei dit chun player ṭha ei mamaw a, chu ding chun player haiin ṭhang an lak a ṭul ve a, an hlim naw a ni le club suoksan an ta, thil pangngai a ni reng a nih. Ni e, player suk hmasawn chu ei nuom pa tak a nih, anachu Ivanovic, Cahill, John Terry hai ka suk hmasawn thei nawh ( eltam deu a defender hai  goal thun dingin a suk hmasawn thei naw thu le striker hai a zuk chek eu na.) Anachu player ka suk hmasawn ngai em em an um a nih, chu ding chun a dawt a dawtin kan thaw tah a, anachu champion na ding chun a lo hun tawk naw a nih” tiin a hril.

Season nawk a hin Chelsea hin striker tu tak am an lak ding chu? Diego Costa hi Chelsea hin an player loan a thang mek Courtois le hin sum seng metin an inthlengpui thei el di’m?