Wednesday 19 March 2014

Van Persie hattrick hmangin United chun Olympiakos lethalin UCL quarter final an lut.

Vawizan khan Champions League last 16 2nd leg chu khelzo ani ta a. English champion Manchester United chun Greek Champion Olympiakos chu Old Trafford ah anlo mikhuola. Van Persie hattrick hmangin 3-0 (Agg 3-2) a hnein ropuitakin Champions League quarter final anin hlangkai.

1st leg a khan Manchester United hin Olympiakos in 2-0 in an lo hne ta nawa. Hi lei hin Olympiakos hi quarter final lût lem dinga ring an nia. Vawizan khawm beiseina insangtak le Old Trafford an hung pana. Sienkhawm United chun an beiseina suktawpin beisei boin an kir.

Tuta season hi a bikin United an che buoi em em a. Player le manager chunga khawm nasatakin pressure a um ta a. Vawizan khawm Moyes ta ding chun hratlo awilo ang tluk ang anih. Hieng ang game khirkhan zana ama enkawlna hnuoia an hlimzan tak tawngin Chelsea hnungzuiin UCL quarter final anin hlangkai ta a nih. 

United hin Champions League ah 1st leg 2-0 a an hratnaw hnunga mi an lethal nuhnungtakna chu kum 30 liemtah kha an ta a. March ni 21, 1984 khan Maradona captain na hnuoia Barcelona chu Camp Nou ah 2-0 a an hnenaw hnungin Old Trafford ah anlo lethal.

Inkhal anţana, United chun nawr nghalin Rooney chun chance a nei nghal a. Hi zo char hin Olympiakos ta dingin Hernan Perez chun goal a thun ţep. 25mins ah Jose Holebas chun Van Persie box sunga a sukthlu a Penalty chawiin Van Persie chu hi penalty hi petin 1-0 in hma anţhuoia aggregate 1-2 ani tah. Anin nawr pap pap a, team pahni hin chance khawm an nei zeu zeu. 1st tawp tawp 45+1 mins ah Van Persie bawkin goal hung thun nawkin aggregate a in draw tain 2-0 in hma anţhuoia 1st half a tawp. Hi goal lut hma hin Da Gea chun vawih ţhatak takin a save.

2nd half anţana United chun an nawr nghala. 52mins ah Van Persie bawkin freekic anthawk a goal thumna hung thunin 3-0 in hma anţhuoia aggregate ah 3-2 in an hrat. Mikhuol team khawmin an nawr ve zinga chance khawm an neiţha ve thei hle. Van Persie bawk hin Dominquez freekick chu alo dang pleu in an ni tieng a thun vang nghe nghe. Goal lut um ta loin United chu ropuitakin Old Trafford ah Olympiakos hnein UCL quarter final anin hlangkai. Olympiakos hi vawikhat khawm English hai khelmuola an la hrat nawa. Vawi 12 an khelna ah an la hratnaw vawnga. Game tina goal 3 insuo zie ang an nih.

No comments:

Post a Comment