Lawmthu hrilin inpak ei tiu.

Mi’n iengtin am an ngai cheu, mi dang hai iengtin am in ngai ve? Ei nuom dan sengin khawvel ei hmang a, a thu nei tak rawi am insawnin IENGKIM CHUNG A RORELTU hi harsat mang ang hun a chau ei ko a, lawm hun a inpak nachang reng ei hriet naw el hlak ding maw?

Kum 2002 kum a World Cup Japan a um kha a hre phak chin hai chun Brazil rambung an thiem zie hre seng ei tih. Germany kha 2^nd half a Ronaldo goal 2 hmangin an hne ban ngat a ni kha. Mipui sangriet laiin an en a, an hlimin an lawmpui a, khawvel pumpui deuthaw in TV  a ei lo en ve bawk a, ei hlimin ei lawmpui hle khawm ring a um. Khang lai zing khan Brazil haiin an Pathien, Abraham a Pathien, Isak Pathien, Jacob Pathien, nang le kei a Pathien ngei an chawimawina an pek dan kha a va hei ropui lawm lawm ngei de aw…! Lungril le titak zet a entu ta ding lem chu lawman mitthli a sur naw thei nawh. Pa lung a va awi awm ngei de maw..!

Khawvel pumpuiin an thlir lai a chungtieng a THLIRTU le ṬHANGPUI HLAKTU an hang chawimawi el kha, mitin lunglai a va hne zo ngei! Kristien sakhuo zawm naw tam tak ta ding khawma  inzaum thil a va kai ngei de aw. An hratna chu LALPA  ani zie an hang puonglang el ngam kha an va huoisenin inpak an va um de aw..!

Vawisun Palm Sunday a hin, ei LALPA ISU KRISTA hnuoia a um sung po po a chawimawia a um ve hun ve sun,hi  ni bek a hin inpakin i chawimawi ve naw ding maw? Ei ṭapin Lalpa ei ko a, ei harsatin ṭhangpuina ei ngen a, rinum ei tuorin inhnemna ding Lalpa kuoma ei zawng a, amiruokchu ei lawm hun a ei zam san el hlak am?

Chawimawi ei tiu, inpak ei tiu, Khawvel pumpui a hrattak nina changtu Brazil hai meu khawm a khawvel mipui po po hmaa ei LALPA hi an inzapui der le, field lailung taka inkuoltuokin an ding ṭhawṭhuon a, chungtieng nghain ROPUINA LALPA chu an inpak ngat chun, nang le kei dai kil kar a mi hai mei mei hi chu khawvel a hrattak nina chang Brazil hai lak a chu ei nep veng vawng vei le, Brazil hai angin ei inpak naw el ding am a ni aw?

Tho ei ta, chapona khotlang a ngir hai khawm tlawmna khur mawngbo a inchawm tla vang vang ei ta, mani hmasielna silfen a inthuom hai khawm, mi ta ding a malsawmna silfen a inthuomin, mi ieng a ngai nawna nun neitu hai khawm, mani ropui deu a inngaina silfen kha hlipin, a mi chawisang theitu ei Lalpa chu hang inpak tlang ei tiu.

                “Hossana, Lalpa hminga hung chu a ham a ṭha, ram hung tlung ding chu an thieng ie,Ei pa Davida ram chu a ham a ṭha, a chunghnung tak a khin Hossana”