Julio Cesar in Chile lakah Brazil sanhim in World Cup Quarter final a lutpui.

World Cup second round game hmasatak chu khel zo ani ta a. A mikhuoltu Brazil le Chile haiin game hmunuom um em em khelin hun pangaiah 1-1 in anin hnetawka. Penalty shoot out hamangin Brazil chun Chile 3-2 a hnein quarter final anin hlangkai. Penalty shoot out a hin Brazil goal nghaktu Julio Cesar in ropuitakin vawihni la a save.

Hi match a hin attacking game hmunuom um tak ei hmu a. Chile hai an khelţha in Brazil an barakhai teu hle a. A hratlem khawm ni hai sien phu chu inti ve hlengtan tih. Chuong lai zingin Brazil game khawm a fuka, a biktakin Hulk a ţangkaiin a khelţha takzet. Neymar khawm nidang angin goal thun naw sienkhawm a khelţha a,ball a chang chun danger area ani nghal zat zat. Chun penalty shoot out a, a tawpna taka a goal thun kha a pawimaw takzet.

Inkhel anţana, team pahni hai an phur tlanga game khawm an rang nghal. Anin nawr pawp pawp nghala, half chance khawm an pahni hni in an nei nuol. 18mins ah corner anthawk Brazil in goal an hung thun nghal. Neymar corner pet chu Thiago Silva in a lo head piel a, far post ah Jara le David Luiz bulah hun vuong pheiin David Luiz chun hnaite ah Jara hnung anthawk goal a thun. Hi goal hi replay a an lang dan chun David Luiz hin Jara ke hnung anthawk Jara ke hmangin a dang lut niin an lang (own goal ti thei chu a nih). Sienkhawm official takin David Luiz goal thun anih.

Chile khawmin hung nawr let ve nghalin ball possession khawm an nei rawn hle. Sanchez a khelţha in Brazil defender hai a chawkbuoi thei hle. 32mins ah Edu Vargas in box sungah vengtu neilo Sanchez a peka, ama hin hnaite anthawk goal thunin 1-1 in half time ah anin hnetawk.

2nd half an ţha a Chile an khelţha in Brazil an chebuoi deu a. Ana chu a tu tieng tieng khawmin goal danger ang chi chu an nei lawm nawh. 55mins ah Brazil chun counter attack ang deu anthawkin an nawr a, Hulk chun goal a thuna chu hand ball leiin pawm an nawh.

65mins ah Isla, Vidal le Aranguiz haiin mawi em em in Brazil defence an ţhieka. Hnaite ah Aranguiz goal shot ţhatak chu Cesar in ropuitakin a lo save. 74mins ah Brazil striker Jo in chance tha ane a hmang tangkai thei nawh. 80mins a hungin her suoka Brazil in ball an hung chang rawn nawk deu a, Chile in defensive game an khelţan. 84mins a Hulk shot thatak chu Bravo in a lo save. Goal lut um ta loin hun pangai a tawp.

Extra time an khel a, Chile haiin goal venghim an ngaipawimaw lem ta a. Brazil in an nawr vieu a half chance ang deu an nei zeu zeu a chu chance thatak anin siemthei bik nawh. Goal um loin extra time 1st half a tawp.

2nd half a khawm Brazil bawk an chunghnung lem a. Chile haiin an goal ruok chu an venghim thei. Brazil hin an nawr taluona lamah hun tawp tawmin counter attack anthawkin Chile in goal anthun teu hle. 120mins ah Sanchez in Pinilla a peka, box sung charah dang ruol loin goal a shot a, goal chungkhang a deng per pawp. World Cup anthawk Brazil pet dawkin an um teu hle. Goal lut um chuong loin 2nd half extra time khawm a tawpa. Penalty shoot out a a hratlem ding an zawng ta a nih.

Penalty shoot out a hin Chile tieng Mauricio Pinilla, Alexis Sánchez le Gonzalo Jara haiin goal an thun naw a. Brazil tieng Willian le Hulk in goal an thun naw ve bawk. Brazil chun 3-2 in penalty shoot out ah hnena an chang.