Khawvel football superstar thar James Rodriguez?

Messi le Ronaldo chu sel ruol loin khawvel football superstar an ni ti ei pawm seng ring aum. Sienkhawm an kum hai hung tam ve mekin kum 30 tieng an hung hnei mek ta a. Tuta inthawka kum 10 sunga football khawvel sukmawitu ding ei mel ţan thei tah.

Zani zana Maracana stadium suk hning uoi uoi tu kha zawng ding ni inla chu tudang ni naw nih. Colombia duotlai James Rodriguez ngei hi a nih.

Kum 22 mi cho James Rodriguez hi tournament ţan ani hma khawm khan mi mit fukna a lo ni ta renga. Zanizana a goal ropui thun pahni hai lei khan khawvel mit a chungah a fu naw thei nawh. A goal thun hmasak mawl kha a nih a ropui em em chu. Khang ang volley kha khawvel keeper a dangthei um ngai naw ni haia. Tu chena World Cup goal thunah chu a lo mawitak el naw ding manih. A goal 2 na kha chu team work ropuitak ei hmu hnunga goal a thun ani a, striker indiktak hai goal thun dang ang ani leiin a nep chuong bawk nawh. Colombia in Uruguay hne a, quarter final ah Brazil an tum theina san chu ama lei ani ei ti naw thei nawh.

Kum 2 liem ta khan James Rodriguez chungah lu huotna ding a um met a. Monaco in ama laklut na dinga £37 million lai an thesuok kha a nih. Sienkhawm tun chu iengkim a chieng tain lu khawm an thak ring a um ta nawh.

Tukum World Cup ah number 10 pek niin a hming hmasa lem JAMES (Ham-ez tia lam ding) ziek a thlang lema. Inhliem Falcao um naw kar an ram innghatna ani der tah. Group stage a po po goal la thun vawngin game 4 ah goal 5 lai a thun ta a. Player dang game tina goal la thun thei umsun chu MESSI char a nih. Neymar, Messi, Muller hai le Golden Boots dawng dingin anin el ding a nih.

Tu zet hin chu Europe club lien po po, Premier League laipui lien hai ţhangin an dit vawng ding an tah. World Cup zo a chu chanchin a nei lien ngei ring a um ta hle.