Netherland hma ah Spain dawl zawrin an zawr dawk.

Spain 1-5 Netherland

(Alonso 27(P) — (R.V Persie 44', 71' Robben 51' 79',Virj 63')

2010 World Cup final re-match ei hmu nawka. Ana chu tuta ţum chu a dan a dang ta hle. Group B match hmunuom um taka hi Spain le Netherland haiin an khela. Netherland chun Champion lai an ni ti theinghilin Spain chu 5 -1 in ansawp.

Hieng team pahni hai hi chu iengtik lai khawm team ţha an ni a. Tuta World Cup fe meka khawm hin Champion dinga beiseium pawl tak khawm an ni hrim a nih. Team ţha ve ve inkhel an ni leiin tukhawmin hieng ang result hi beisei naw reng reng an tih. Ana chu football ani tlat si, iengkim an leng vawng hi a hmunuom na tak chu a nih.

Boruok insangtak hnuoiah inkhel an ţan a. Dan pangaiin Spain in ball an chang rawn lem nghal. A tu tu tieng khawmin half chance ang deu chu an nei nuol ve ve. Spain striker Diego Costa chu lone striker angin a um a. Ball a chang zatin home fans haiin an 'boo' nasa thei hle. Louis van Gaal in Spain tactic hriein goal venghim a ngaipawimaw hle a. A formation khawm 5-3-2 in a hung rem a nih.

Inkhel ţan ani anthawk 27 na ah Spain chun Alonso penalty hmangin 1-0 in hma anţhuoi. Stefan de Vrij chun Costa box sungah a sukthluka penalty a chawi a nih. Hi zo khawm hin Spain bawkin game an thunum lema ana chu goal chance ruok chu an neithei bik ta nawh. Goal dang lut loin 1st half a tawp dinga an lang laiin 44 mins ah Daley Blind chun centre line pel met anthawkin crossing ropuitak a peka. Hi crossing hi Dutch captain Van Persie chun mawi em emin lo head lut in 1-1 in 1st half ah anin hnetawk.

2nd half ah Goal a sur:

2nd half an ţan a, inkhel boruok a dang ta hle. Netherland an khelţha deu deu a, Spain game a mumal naw deu deu. 53 mins ah Daley Blind bawkin Robben ta dingin through ball a peka, Robben chun mawitakin a ke vawitiengin a lo lakthla a. Pique a hlem hnungin hnaite ah Ramose in a hung dang hmain a peta. A goal chieng hle.

Netherland game a fuk ta hle a, game khawm an thunun hne ta hle. Spain players hai an che buoi a, ball khawm anin pass hleithei ta nawh. 60mins ah V. Persie in box sirtieng anthawk goal chungkhang an dengtir dawt bawk. Spain hin Costa lasuokin Torres anin lut tira chu umzie a um nawh.

Hi zo 64 mins ah Sneijder free kick anthawk Stefan de Vrij chun hnaite ah a head goal nawka 3-1 in hma anthuoi. 72mins ah Casillas pet dawk suol chu V. Persie in a hung nang chil a, goal a thun chieng nawk hle. Netherland hin game an thunun sunzawm zinga 80mins ah through ball hung a hnawt luta, Ramos le Pique'n an hnawt phak naw hle. Casillas hlem nawkin goal a thun nawka 5-1 in hma anthuoi. Hi zo khawm hin Robben chun chance tha a nei a chu Casillas in a lo save hram. Hun tawptawmin Torres in goal thuntheina hunţha tak a nei ve hlau a, ana chu hau takin a ţhel. Hun a tawp meu chu Netherland 5-1 in hnena an chang.

Inkhel kha ei thlir a, Spain players hai kha a bikin 2nd half a khan an chau ta hle niin an langa. Iengkima Netherland players hai an phak naw ani tak. An khel dan style "tiki tak" hi players tha le coach tha hai hin an hriet hne vieu ta khawm nisien a hawi. Champion lai hi muolpho takin World Cup a hin sawisak an nel dim maw. . . . Iengkawm nisien game khat cho a la ni a. An quality ţhatzie chu ei hriet seng. A nawka an game khel ding hmunuom um hleng a tih. An coach khawmin players a siksawi nuol ring a um.

Man of the match - Van Persie