Hillsborough Disaster

Hillsborough disaster hi mi tamtak chun hriechieng tawl ta ngei ei ta. La hriechieng bek bek lo khawm um ngei ei tih. Khawvel football history a sietna rapthlak pawltak le British football history a sietna rapthlak tak chu April 15, 1989 khan Hillsborough khelmuolah Liverpool le Nottingham Forest haiin FA Cup semi final an khel lai a tlunga. Kha sietna rapthlak tak kha Hillsborough disaster tia hriet a nih.

Khang lai huna khan FA Cup semi final chu neutral venue a khel hlak ania. FA chun Hillsborough Stadium chu Liverpool le Notingham Forest hai inkhel na dingin an thlanga. Hi stadium hi Sheffield Wednesday hai home ground a nih. Khanga football anin khel lai khan mi tamtak stadium sunga inleng lo hai chu tuola an uma. Lut ve nuomin anin nek buoi tah a , a lutna gate chu hung ner chimin tunnel ah hungin hnaw pheiin inchil buoina namenlo a tlung tah a. Mi 96 zetin thina an tuoka, mi dang 766 zet an hliem a nih. England ah chu FA Cup in ngaihlut a hlaw zie chu ei hriet. Hi match khawm hi fans haiin an  ngaipawimaw in entu khawm an thahnem chungchuong hle a. Beisei lo hil a tlung pha tah a nih.

Ei hril ang khan hi inkhel en ding hin mipui an tam hle a. Ni danga an lo thaw hlank angin khingtieng fans hai ve ve chu a hran hlawka inhung tir an nih a. KIverpool fans 24,256 hai chu North le West end haia inthung tir annia. Nottingham Forest hai chu South le East end haiah inthungtir an nia, mi 29,800 lai an um a nih. Liverpool fans hai hi antam lema chu seat tlawmlemna tieng pek an nia, asan chu khingtieng fan hai le anin fe paw vengna dinga thaw a nih. Liverpool tienga hung lu hai poin khingtieng hai hi sukbuoi loin an lu thei ding a nih. Anin khel ni khawm hin an hrietlawk ang el in radio le TV hai anthawk fans ticket neilo hai chu a ena fe lo dingin an hril.

Inkhel entuma fe fans tamtak hai chu thawveng malamin stadium sungah lut vat loin tuol lai chun anla hang um khawmuonga. Stadium lutna gate chite (Turnstile) ah mipui an hung tam deu deu a anin hnaw ping tah a nih. Hienga mipui anin hnawping tah phing le ticket nei si an lut nawna ding tienga lo fe hai an lut phalpek an ni ta naw phing le hung suok thei ta loin gate bul lai chun anin tang tah a nih. Players hai tunnel anthawka an hung suok le in ruolin stadium sunga mipui khek ri dur dur chu tuola um haiin an hrieta. Lut chak ve em emin lut thei si loin anin nek buoi tran ta a. police haiin game hi thuneitu hai delay (sukhnik) dingin an ti a, anan chu an sukhnu chuong ta nawh.

Hienga fans tuola um 5,000 deuthaw anin nek buoi tah lei hin police hai chun exit gate (stadium sunga um hai suokna) lenlem chu an hawng tah a. Gate dang pahni khawm hawng belsa a nih bawk. Hienga gate an hawng tah phing le mipui 1,000 vel chu stadium sungah an lut thei ah a. Lutna la chang ve lo mipui a za tel hai chu tunnel sunga anin heng buoi nawk tah a. Stadium lailung lai mipui anin leng tah naw leiin a sir tienga fe dingin an hrila, sienkhawm iengkhawm zawm a um tah nawh. A tir chun hi laia buoina hi hriet vat ani nawh.

Iemani chen game a fe hnung chun fans thenkhat tlansiet tum hai chu fencing anthawk an hung kai phing le, police hai ngenna angin referre chun match a suk tawpa. Hieng lai hin fencing a gate chite chu vouk hawng niin fans thenkhat chu hi taka inthawk hin an suok dawk. Police haiin field sunga hung tlanlut fans thenkhat man an tum laiin tamtak chu fencing ah an lo kai mek bawka. West stand a um hai khawmin stadium suoksan tumin a chung tieng suok an lo tum mek bawka. Innek buoina chu hung nasa peiin fencing chu hung ner chimin anin chil buoi tah a nih.

Fans tamtak chu stadium lailung lai hin hnawping an ni a, hi lei hin a thi tamak hai kha Compressive Asphyxia (in hneng de taluo leia thuok insam) leia thi an nih. Police, steward hai ta dingin chang ngaina a um ta naw a. Fans a hliem lo haiin a hliem hai an thangpuia. Field sir a advertisment hoarding hai pawthla in inzawn nain an hmang. Hienga buoina a nasa hnung khawm hin Police hai chu la duty in Liverpool fans le Nottingham Forest fans hai in fepaw ding an la gang zinga  fans tamak ambulance nghaka hliem hai thangpui ding hai chu an lo dangkir bawk. Thangpuitu ding Ambulance 44 zet a hunga Police hai chun pakha char stadium sungah anin lutir.

Kha sietna rapthlakak lei khan mi 96 in thina an tuoka. Kha ni khan mi 94 an thi a, kum 10 le kum 67 inkar an nih. hi hai hi stadium sunga thi, Ambulance sungah thi le hospial an tlung hnung sawtnawte hnunga thu dam an nih. Hliem po hi mi 766 an nia, hieng hai lai 300 chu hospitals a enkawl ngai an nih. 19 April khan Kum 14 mi Lee Nicol chu a hliemna tuorzo loin a thi nawka. Thi hi 95 an hung tling chara. March 1993 khan khang lai huna kum 22 mi Tony Bland chu thi ve nawkin thi po po hi mi 96 an tling tah a nih.



" You Will Never Walk Alone "

Lawmthu hrilin inpak ei tiu.

Mi’n iengtin am an ngai cheu, mi dang hai iengtin am in ngai ve? Ei nuom dan sengin khawvel ei hmang a, a thu nei tak rawi am insawnin IENGKIM CHUNG A RORELTU hi harsat mang ang hun a chau ei ko a, lawm hun a inpak nachang reng ei hriet naw el hlak ding maw?

Kum 2002 kum a World Cup Japan a um kha a hre phak chin hai chun Brazil rambung an thiem zie hre seng ei tih. Germany kha 2^nd half a Ronaldo goal 2 hmangin an hne ban ngat a ni kha. Mipui sangriet laiin an en a, an hlimin an lawmpui a, khawvel pumpui deuthaw in TV  a ei lo en ve bawk a, ei hlimin ei lawmpui hle khawm ring a um. Khang lai zing khan Brazil haiin an Pathien, Abraham a Pathien, Isak Pathien, Jacob Pathien, nang le kei a Pathien ngei an chawimawina an pek dan kha a va hei ropui lawm lawm ngei de aw…! Lungril le titak zet a entu ta ding lem chu lawman mitthli a sur naw thei nawh. Pa lung a va awi awm ngei de maw..!

Khawvel pumpuiin an thlir lai a chungtieng a THLIRTU le ṬHANGPUI HLAKTU an hang chawimawi el kha, mitin lunglai a va hne zo ngei! Kristien sakhuo zawm naw tam tak ta ding khawma  inzaum thil a va kai ngei de aw. An hratna chu LALPA  ani zie an hang puonglang el ngam kha an va huoisenin inpak an va um de aw..!

Vawisun Palm Sunday a hin, ei LALPA ISU KRISTA hnuoia a um sung po po a chawimawia a um ve hun ve sun,hi  ni bek a hin inpakin i chawimawi ve naw ding maw? Ei ṭapin Lalpa ei ko a, ei harsatin ṭhangpuina ei ngen a, rinum ei tuorin inhnemna ding Lalpa kuoma ei zawng a, amiruokchu ei lawm hun a ei zam san el hlak am?

Chawimawi ei tiu, inpak ei tiu, Khawvel pumpui a hrattak nina changtu Brazil hai meu khawm a khawvel mipui po po hmaa ei LALPA hi an inzapui der le, field lailung taka inkuoltuokin an ding ṭhawṭhuon a, chungtieng nghain ROPUINA LALPA chu an inpak ngat chun, nang le kei dai kil kar a mi hai mei mei hi chu khawvel a hrattak nina chang Brazil hai lak a chu ei nep veng vawng vei le, Brazil hai angin ei inpak naw el ding am a ni aw?

Tho ei ta, chapona khotlang a ngir hai khawm tlawmna khur mawngbo a inchawm tla vang vang ei ta, mani hmasielna silfen a inthuom hai khawm, mi ta ding a malsawmna silfen a inthuomin, mi ieng a ngai nawna nun neitu hai khawm, mani ropui deu a inngaina silfen kha hlipin, a mi chawisang theitu ei Lalpa chu hang inpak tlang ei tiu.

                “Hossana, Lalpa hminga hung chu a ham a ṭha, ram hung tlung ding chu an thieng ie,Ei pa Davida ram chu a ham a ṭha, a chunghnung tak a khin Hossana”

Sunday Special: Alvaro Morata, Hairstyle umze ropuitaka nei.""

Spain le Real Madrid forward Alvaro Morata chun a sam a vawkawl hi mi tamtakin mak an tih a, a san hi a ropui hle leiin vawisun Sunday Special a tawi fel deuvin hung tarlang zawk ei nuom a nih.

Footballer tamtak hai chu an hairstyle chenin miin an copy hlak a, a ngaisangtu hai chun an mi ngaisang zawng hai umdan phawt entawn an nuom ve hiel hlak. Cancer a na naupang ṭhenkhat hai khawmin Alvaro Morata hairstyle ang nei hi an nuom a, ama an ngaisang leiin lo entawn ve chu an nuom thei hle. Amoruokchu cancer a na an ni leiin an sam vawkawl a ngai leiin an duthusam chu a puitling thei nawh.

Morata chun hi thu hi a hrietin, a lungril a tawk em em a, naupang cancer a na hai hairstyle ang chun ama khawmin a tan ve tawp el a nih. An ni lei lieu lieu in an hme tam an hme naw tam, a sam a vawkawl a, naupang hai chun ama hairstyle ang an nei theina dingin anni chu a entawn ta lem a nih.

Morata chun hi thu hi hrilfie in, "Hospital a naupang cancer natna nei hai lai ka hairstyle ang nei nuom hi an um ti ka hriet a, cancer a na an ni leiin an nei thei si nawh, chu leiin an ni hairstyle chu ka entawn ta lem el a nih" tiin media le journalist hai bula a hril.

Ni e, sam hin hmel a siem ve a, sienkhawm hmel a mawi a, lungril a mawi si naw chun ieng am ṭangkai a ta? Mi lungsietum tak tak, natna khum a zal hai ta ding lieu lieua a sam mawi tak a zuk tan tawp el hi ngaisang a um ka ti em a, ka hung tarlang ve tawp a nih.

Mi hai ta ding a malsawmna ni ding chun, taksa mawina hlipthlak a, tisa thil hai ensan a, lungril thienghlim le mihai lunginsietna ei nei a ṭul tak zet a nih.

Chawlni hmang inhawi seng ro.

SUNDAY SPECIAL "KAKA, Khawvel hrieta Isu hmangaina puongtu."

Ziektu: Lh Pulamte.

Tulaia thalaihai le football khel inhnik hai tading chun football khawvela hriet hlaw em em, abikin ei ni Kristien hai ta ding lem chun a ringna leia langsar zuol, football khelthiem KAKA hi a chanchin tawite’n vawisun SUNDAY SPECIAL in ei hung suklang tum chu anih.

Ei hril ta ang khan Football khawvelah a hmelhrie naw rak an um ring a um naw khawma a tobula inthawkin hang biechieng ei tih. Brazil khu ei hrietseng ta angina sum tiengpang le thildang hrim hrimah hming inlarna taluo annei nawh a, an inlarna tak chu football ah anih ti inla inkhel taluo naw nih. Cofee tieng an export nasa bawka, chun tulai UFC Pride Fighting tieng khawm an che nasa hle bawk. Football khu an inhnik nasa em ema, nitin hin footballer thatak tak an suok zing anih. Chulaia chun April 22, 1982 kum khan KAKA hi RICARDO IZECSON DOS SANTOS LEITE ti hming chawiin Gama khuo, Brazil ah Simone dos Santos (elementary school zirtirtu) le Bosco Izecson Pereira Leite (civil engineer) hai karah a hung pieng anih. Unaupa (sang) pakhat a neia, unau pahni cho annih. A sangpa Rodrigo hin a chinlaiin a u hi a ko thiemnaw leiin KAKA (Ricardo) tiin a ko hlaka, chutaka inthawk chun a hmingpum in lang lek lova Kaka tia hriet lar a hung ni tah.

Ei hril ta ang khan Brazil khu football inhnikna ram ani leiin a chinlaia inthawk hin a
pa’n football inchuktirin an hnelpui tana. Kum 7 mi cho ani lain an sungkuo hi Sao Paolo ah an insawna, a school thar kaina ah School tournament an buotsaiah Kaka khawm hi inkhel ve in hi hi football khawvela a hung suok tanna chu anih. Hi tournament an khelna a hin Sao Paolo Club (Brazil a club tha pawl ve anih) chun an Youth Team-a inhnel dingin an lak nghala, chu chu professional football a lutchilna anih. A khel thiem zie hmu in Turkish 1st division club chun kum 17 ani kum hin an club a inhnel dingin inchawk an lo tuma, sienkhawm Sao Paolo Club le hin man le muolah an inrem theinaw leiin an thul nawk anih.

Kaka hi naupang chite ani laia inthawk rengin nu-le-pa thu awi, Pathien ti em em tu anih. Tawngtaina le Bible tiem hi an thlada ngai naw a, inkhelna hmun le hmun dang danga khawm tawngtaina hmang pei hlak mi anih. Sao Paolo Club ah a khel lai kum 2000 kum khan chawl hmang dinga a pa hai kuomah a hang inlawi chu swimming pool diving board anthawka an chawmtlak chu swimming pool tuongah an tet a, a ringru iemani zat le a zangru a tet tlieka, football khel nawk thei dinga beiseina a um ta nawh. Doctor han theitawp suo a an beihnung chun a tlawmtaka football inkhel nawk ding chun a thlaruk bek ngai dingin an hrila, khawvel thlirna anthawk chun football khawvelah a hung inlang nawk hi ring ngam an ta nawh. Sienkhawm hi a accident tuok hi Pathien le inpawlna hun thatak siempektu ani zie hi ama ngei anthawkin hrilsuokin a um tlat. Hienga natna khumah a zal lai khawm hin Pathien kuoma tawngtai le damna hniin a tawngtai ngat ngat a, Pathienin a mihai, an thatna din iengkim a thaw pek hlak ti kha hrezingin maktak elin Pathien sukdamna a changa, thlahni hnungah football a hung khel thei nawk anih. Hi a damna thu hi Pathien sukdam lieu lieu ani zie ama ngei khawma a puonglang. Ama chun “Natna khumah ka zal sung popo hin Pathienin ami umpui tlata, mi sukdamtu chu Pathien anih” tiin khawvel hrietah a tlangzar anih.

Inhawi a ti em em football khel nawk el thei dinga damna a hang chang nawk el ta chu a hlim em ema, Pathienah ringna innghat a hlawkzie le ringtlak ani zie chu mi tinrengin hre hai sien nuomna lientak a hung nei pha a, Chanchintha hrilna din inkhelna hmun chu a hmang ta anih. Kum 2002 World Cup ah Brazil an champion tum khawm kha I lo en am??? Kha tum khawm khan Pathien hi ringtlak ani zie suklangna’n God is Faithful ti inziekna T-Shirt a hak ngat ani kha. Chu zoah AC Milan club ah anhnel laiin Italian League champion an ni khawm khan Kaka bawk hin I belong to Jesus ti inziek a hung haksuok nawk ngat bawk. Chuong ang bawkin kum 2005 kuma Confederations Cup an champion khawm khan Jesus loves You ti inziek a ruol thenkhat hai leh an hung haksuok nawk anih. Kum 2007 Champion League an champion tum khawm khan I belong to Jesus ti inziekna zakuo bawk chu a hung haksuok nawk.

Bible tiem le tawngtaina chu a hringnun keithuoitu pawimaw tak anni a, chu chu tuchen hin a tawpsan phal nawh. Goal a thun pha a kut vantieng khikin a en hlaka, Pathien malsawmna anih a ti hlak anih.

Kristien tlangval fel, hmeltha bawk, inkhel thiem, hausa bawk chu khawvel nunghak “kei ka nih” in ti hai star hrawn a hung ni tah. Khawvel inhawitirna chen nuom nisien chen ding sum le pai, nunghak chu hmu rawn hle’ng a tih. Sienkhawm, rawngbawl dinga samdam ani zie an hrietchienga, Football anthawka malsawmna a dawnghai chu Pathien I pek ani zie a chieng bawka, khanga vangduoina namenlo a tuoka inthawk lem khan chu sum a hmusuok popo hi bat der lovin sawmapakhat indiktakin a pek hlak. Chu el chu ala ni nawh, Brazil mi hausa sungkuo anthawka seilien, Nunghak Caroline Celico, tleirawl anni laia inthawka in ngaizawng, leh 23rd December, 2005 khan Reborn in Christ Church, Sao Paolo ah kohran dan thienghlimin an innei a, an innei lai hin an pahni hin an virgin ve ve anih. Tuhin nau pasalte pakhat Luca Celico Leite (10 June 2008) le nuhmeite Isabella (23 April 2011) an nei tah.

Kum 2001 anthawk khan Sao Paolo Club ah a vawikhatna din January thla khan Senior team ah abul a hung tana. Hi session a hin vawi 27 inkhelah vawi 12 goal a thuna, a kum nawkah vawi 22 inkhelna ah goal 10 a thun nawk. Goal a thun el khela hin assist thatak tak le mawitak tak a siem bawk. Hieng an hnelna anthawkin European Club tamtak chun an club-a inhnel dingin an lo melkai zinga, kum 2003 ah AC Milan (Italy) chu Champion League ah hratna an hung chang khan an club inthuom tharna din player tha an melkuol vel na ah Kaka hi an tawngfuk hlau a, Sao Paolo anthawk hin $8.5 million in an laksuok ta anih. AC ah ankhel a session khatna ah vawi 30 inkhelin goal 10 a thuna, AC Milan chu Scudetto ah le European Super Cup ah an champion pha anih. Kum 2005 Champion League final ah Liverpool FC an hnenaw tum khan Best midfielder of the tournament inhlan anih.

Kum 2005-06 session a hung inhersuok lem khan chu AC Milan tadingin Italian League le European competition ah hattrick a siem ve ve anih. Kum 2006-07 Champion League ah top scorer niin goal 10 a thuna, AC Milan chun 2005 Champion League final a anhne naw Liverpool bawk chu Final ah 2-1 a hne in Champion a hung ni pui ta anih.

Kaka hi a fena tieng tieng mihai inpak le lawm a hlaw a, Italy Prime Minister khawm lo ni tah, AC Milan President Silvio Berlusconi chun “Ama ang makpa dinga neitu le pasal dinga neitu hi chu mi vangnei tak ni ngei a tih. Inkhel a thiem thu hi hriltam a ngai naw a, A nun a mawi em ema, Kristien tlangval indik tak, khawlai hmuna khawm ringtu anina inzapui ngailo le Krista chanchintha hrilna kawnga taima tak chu Kaka hi anih” alo ti ve ngat bawk anih.

Ei ni khawm ei phak tawk peiah Isu Krista mi hmangaina hi ei tlangzar ve naw dim anih???

Chawimawina a dawng langsar zuolhai cho :
• Serie A Foreign Footballer of the Year: 2004, 2006, 2007
• Serie A Footballer of the Year: 2004, 2007
• UEFA Champions League Bronze Top scorer: 2005–06
• UEFA Champions League Best Midfielder: 2005
• UEFA Team of the Year: 2006, 2007,2009
• FIFPro World XI: 2006, 2007, 2008
• UEFA Champions League Top Scorer: 2006–07
• UEFA Champions League Best Forward: 2006–07
• UEFA Club Footballer of the Year: 2006–07
• FIFPro World Player of the Year: 2007
• Ballon d'Or: 2007
• FIFA Club World Cup Golden Ball: 2007
• Toyota Award: 2007
• FIFA World Player of the Year: 2007
• Onze d'Or: 2007
• World Soccer Player of the Year: 2007
• IFFHS World‘s Best Playmaker: 2007
• IAAF Latin Sportsman of the Year: 2007
• Time 100: 2008, 2009
• Maracanã Hall of Fame: 2008
• Samba d'Or: 2008
• FIFA Team of the Year: 2008
• FIFA Confederations Cup Golden Ball: 2009
• FIFA Confederations Cup Best XI: 2009
• Marca Leyenda: 2009
• FIFA World Cup Top Assister : 2010
(Sources : 1. Wikipedia, 2. Kristian Thalai)

Samari miţha Cristiano Ronaldo

Real Madrid superstar Cristiano Ronaldo chun naupangte thla 10 mi 'neurological disorder' neia pieng chu an atna (operation) ding man po po a tum pek.

 Hi naupang hi a hming chu Erik Ortiz Cruz ania. A pienghlim anthawkin hi natna hi invawi ania. An enkawlna sengso hi a tam em ema. Vawikhat test na ringawta khawm £5,020 (6,000 euros) lai ania. Hospital bill le an operation na ding po po a an sengso ding chu £50,240 (60,000 euros) Rs. 5092346.0 vel a tling a. An venga tlawmnga pawlin hma lain pawisa an ngaituoa. Hieng thu hi Ronaldo'n a hrietin a lungril a tawk ta em ema, ama hi a hungin rawl ta a nih.

A tir chu Ronaldo hi a zakuo (jersey) le a ballboot fun rising na dingin hung pesuok dingin an ngena. Sienkhawm mi hmangaina hau tak Ronaldo hin a renga seng ding po po hi a hung tum lem ta a nih. Naupang le a sunghai ta ding chun Samari miţha a va hang ni ngei de... A loin tiemlawk ang ngeiin tukum kumbul khawm khan Ronaldo hin naupang Leukaemia natna invawi hai le Ballon d'Or lawmman a dawng a lawmna hun anlo hmang ta bawk. Kha ţum khawm khan Ronaldo chun naupang pakhat operation nei ding kawla " lungngai naw rawh ka theinghil nawh" tiin a thutiem a theinghil naw thu a hril.

Ronaldo hi mi tamtak chun a puo a en hin an hnama. Field sunga a chet dan hai vel le a ţawngkam ţhenkhat hai hi mi nakkhei zawng khawm a lo ni thei. Ana chu ama hi mi hmangaina hautak ani zie chu mi harsa hai a thangpuina tamtaka inthawk hin an lang. Ieng angin hausa in pawisa hau inla khawm hmangaina le naw chun chu mi harsa hai ţhangpui hi thil awlai chu ani naw hle. An pekna hi a ropui takzet. #RESPECT

Footballer hausatak Cristiano Ronaldo

Sports website ringtlak pawltak goal.com in kumtina an suksuok hlak 'Goal Rich List' chu vawisun khan released ania. Khawvela footballer hausataka Ronaldo chu thlang ani a. Ronaldo thilnei po po hi €148 million vela hisap anih. Pahnina a hin Barcelona Superstar Lionel Messi a uma. Ama hi a rothil nei po po hi €146 million vela hisap a nih. Pathumna ah Chelsea star Samuel Eto'o a uma. Ama hin €85 million lai rothil aneia hisap ani a.

A rangking an sang nasan hi Russia Club Anzi a a khel lai khan a hlaw rawn hle lei a ni bawk. Palina ah Manchester United star Wayne Roony a uma. Ama khawm hi €84 million vela hisap a nih. Goal Rich List a hin footballer la khel mek hai cho a huoma. Nikuma pakhatna David Beckham khawm hi Ronaldo nekin alo la hausa lem ani khawm a ţhang thei ta nawh.

Footballer hai hausakna hai hi a career sunga an sumlam po po tiem vawng a nih.

GOAL RICH LIST TOP 10»
10. Thierry Henry - €57m (£47m)
9. Gianluigi Buffon - €63m (£52m)
8. Zlatan Ibrahimovic - €69m (£57m)
7. Ronaldinho - €78m (£64m)
6. The Neymar family - €80m (£66m)
5. Kaka - €82m (£67.5m)
4. Wayne Rooney - €84m (£69m)
3. Samuel Eto'o - €85m (£70m)
2. Lionel Messi - €146m (£120.5m)
1. Cristiano Ronaldo - €148m (£122m)