Alex Song Man Utd in an lak lut tum

David Moyes in a central midfield sukkhauna dingin Barcelona intalbuoi mek Alex Song lak lut a tum ti thuthang a um a, euro 15 million lai zet seng an huom a ni awm. Amiruokchu Alex Song hi AC Milan le Liverpool khawm a lak lut a lo tum ve zing leiin, Man Utd hin season nawk Champions League an khel  ve hmel ta si naw leiin an lak lut thei chu ring a um taluo bek nawh.

Kum 26 a upa Alex Song hi tuta season Barca ta dingin vawi 28 lai an lang vet ah a, vawi 12 a start ta bawk. Barca a hin contract kum 3 lai hmang ding la nei sienkhawm suok hi pawi ti bek dingin an lang nawh. Hi Cameroon international player hi kum 2012 nipui lai khan euro 15 million lai seng a Barca in Arsenal a inthawk an lak lut kha a nih.

David Moyes in Toni Kross le William Carvalho a lak lut thei ngat chun Alex Song hi central midfield a chu a pawimaw chuong lem di’m maw?

Hazard a thabawi? PSG ah a lut ding?

PSG hai chun Chelsea star Eden Hazard chu an dit thu an tarlang a, nilaini zan a PSG in 3-1 in Chelsea an hne ṭum a Chelsea goal umsun thuntu Eden Hazard hi tuta nipui transfer window inhawng lai hin PSG chun lak lut an tum ni tarlang a nih.

Hazard khawm a hi thu le inzawm hin ṭawng suok vein,” Ka nuhmeiin Paris a fe dingin a mi ti chun chipchier takin la ngaituong ka tih.”ti’n  a hril ve bawk. Ligue 1 tieng hin kir nawk chie sienla an lar naw pha sawt di'm chuh?  Chelsea a hin hlim nawna iengkhawm a nei chuong nawh a, a nuhmei a zuk ngaituo deu lei a nih.

Pasal tawp hi chuh!!

Mi 5 Manchester United in lak lut an tum nasa zuol hai

1.      William Carvalho : Angola a pieng nisien khawm Portugal ta dingin an khel a, hi player naupang hin Man Utd midfield a hnawkhat zo ve ngei chu beisei a um hle. Man Utd in midfielder ṭha an pawimaw zie chu an lang em em a, Paul Scholes, Ryan Giggs hai an lo chuoi tawl ta leiin player thar an mamaw tak zet a nih. William Carvalho hi lak lut tuma an mel mek lai a ṭhangsa bawk.

2.      .Luke Shaw:- England international player le Southampton left-back hi Patrice Evra um naw hnunga a hmun ruok hluo bittu ding a Man Utd in an beisei le an lak lut tum chu a nih. Alexander Buttner  khan Bayern le an inkhel ṭumin Arjen Robben lakakhel ṭha vieu sien khawm, Luke Shaw a ṭhat em leiin ama lak lut ngei chu Man Utd in an tum nasa hle.

3.   Toni  Kross:- Bayern Munich le German international midfielder Toni Kross hi Man Utd in nipui insawnsifar tukver inhawng sung a an lak lut tum bek bek el chu a nih. Ama chang theina ding hin $50 million chen khawm seng an inhuom a, tulai hnai el khawm Moyes in an khel a en tlak ve zau zau bawk. Kross hin Bayern a contract thar a ziek naw chun tuta a contract hmang lai mek hi season nawk a bo ta ding a ni leiin Man Utd ta dingin thil ṭha a ni ngei ring a um. An lak lut zo chie ding am?

4.   Ilkay Gundogan:- Hi German international le Dortmund midfielder suong tawlawi hi tuta season sung inhliemna a nei leiin a khel mumal hman nawh a, nisien la khawm a ṭhat zie chu hril sei a ngai nawh. Midfielder duthusam taka Man Utd in an nei theina ding chun ama ngei hi an lak lut tum a nih.

5.  Marco Reus:- Attacking midfielder inrang tawk tak an mamaw taluo hran naw lai zingin, Marco Reus hi hei la lut chie hai sien Rooney khawm a duthusam suk puitlingin a position inkhel nuomna tak Striker a lut thei bawk a ta, Man Utd chu a tawk intak rek chem. Chem. Ngawt an tih. Mata, Janujaj, Rooney, Van Persie hai le Marco Reus hi zuk inthlawp chie hai sien chu, Europe a chu nep naw hleng an tih. Marco Reus hi United in lak lut an tum laia pakhat chu a ni ve.

Sum an nei a, David Moyes hi season nawk a la cham ding am ti ruok chu hriet chieng ni naw sien khaw, player inchawkna ding sum an tlasam naw hle a, khi po khi inchaw ngei hai sien chu Man Utd chun tudang ngai tan aw hleng an tih.

Nipui insawnsifar tukver inhawng lai Torres in Chelsea a suoksan ding??

Chelsea chun an chawtu an um naw tawp khawm a loan beka insuok tir ding tiin Fernando Torres chungchang an ngaituo mek thu The Telegraph chun a tarlang kuou el tah. Torres hi Inter Milan le a club hlui Atletico Madrid haiin an lo beisei ve bawk a, amiruok chu Chelsea a kar khata a hlaw zat  £175,000- pek zo chu an inhuom naw a, a man a hin £20  million sak a ni a, khawm hi a tam an ti ve ve.

Chelsea manager Jose Mourinho chun an player inchawk fuk naw hai inthlawng zung zung a, an zawr dawkna man a player ṭha lem lak lut a tum a nih.

 Chelsea hin Diego Costa chu Atletico Madrid a inthawk laklut an tum ṭal niin thu thang a um mek a, chu le remchang dingi ding chun Atletico goal keeper Thibaut Courtois tuta Atletico a khel mek hi Chelsea in loan a an insuoktir a nih a, Costa le inthleng kuol a sum seng met khawm a inbe rem theina dingin a remchang hle a. Atletico hin Costa an insuoktir nuom chie di’m ti chu chanchin ngaiven um tak chu a nih.

Torres hin a club hlui Atletico ah hin umsawng ding nekin loan a khel chu a thlang lem ring a um tiin The Telegraph chun a ta;lang sa bawk a nih.