Real Madrid le Bayern Munich hai hi Champions League ah ring kai bik an ni nawh- Mourinho

Chelsea manager Jose Mourinho chun Real Madrid le Bayern Munich hai chu Champions League nomawi dawm dingin ring kai bik anni naw thu a hril.

Mitamtak chun European Champion ni mek Real Madrid le 2012-2013 season a champion Bayern Munich hai chu hi inelna a Champion thei dingin an ringa, an players hai le team khawngtak an ni zie hai en chun team dang lakah ring anum bikna khawm tamtak um ngei a tih. Sienkhawm Mourinho chun Champions League nomawi dawm dingin tukhawm ring kai bik an um naw thu a hril.

"Champions League la dingin beisei an um bik ti hi chu ka ringnaw tawp, asan chu Champions League hin insuk barakhai theina hmun a um tlat. Kum 10 liemta kha hang thlirkir inla, hi inelna a hrattak nina chang dinga ei ring an hrat chang auma. Ana chu ei ring beklo hung hrat khawm an um anih. Anin buktawk char anih."

"Mi'n hrat dinga an ring biklo team 3/4 vel chu um an tih. Knockout stage a hin chu kei chu a khân bik deu ti ka nei nawh. Ka ta ding chun team 16 hai hi an khân seng" tiin a hril.

Vawizan zanrilah hin Premier League hmațhuoitu Chelsea chun Europe khawmuolpuia inelna hlutaka last 16 khel dingin Parc des Princes khelmuolah Paris Saint Germain anva hluokhum ding ani a. Season hmangțhatak Chelsea hin hi competition hi lak ngei an tum a, vawizan khawm hin hnena chang ngei chu tum an tih.

Real Madrid chun Bayern Munich hnein Champions League final anin hlangkai

Real Madrid chun Sergio Ramos le Ronaldo hai goal thun hmangin Champion lai Bayern Munich chu 4-0 (Aggregate 5-0) a hnein kum 2002 hnungah a vawikhatna dingin ropuitakin Champions League FINAL anin hlangkai. Real Madrid hi vawizana inkhel ding Chelsea le Atletico Madrid hai a hratlem lem leh thla tharah Lisbon ah final khel an tih.

Ei hriet angin tulai football khawvelah chu Bayern Munich hi team ṭha pawltaka ngai an nia. Season hmasak khan semi final ah Barcelona chu 7-0 laiin an hne a. Sienkhawm vawizan chu khang ang deua hnein an um ve ta a nih.

Hi inkhela hin Real thiempuipa Ronaldo chun tuta tournament fe mekah a goal 16 thunin Champions League ah season khata goal thun rawntak a siema. Messi record siem season khatah (14 goals) chu a khûm tah.

1st leg a khan Real Madrid hin Bayern hi 1-0 in an lo hne tah a. Hi lei hin beiseina insangtak leh Munich khawpui Allianz Arena an pana. An beisei phak baka insang result hlawsuokin ropuitakin final anin hlangkai. 

Inkhel anṭan a, Neuer chu Gareth Bale a khilai ṭep nghal. Neuer a ball clear chu Bale hmaah a tla a, Bale hin goal ah shot nghalin a over hlau. Real goal thunna dingin hun a lak sawtnawh. Hi zo sawtnawte hnung 16mins na ah Modric corner pet anthawkin vengtu neilo a um Ramos chun a head goal a Real chun hma anṭhuoi nghal. Minute 4 hnungah Di Maria cross chu Pepe'n inhmawtakin Ramos a pek phei a, ama hin dive malam in a head goal a 2-0 in Real chun hma anṭhuoi. Bayern chun hung nawr vein ana chu iengtak an law thei nawh. 1st half ah hin ball possession hau lem hai sienkhawm chance an neinaw hle a. An attacking in umzie a nei thei meu nawh.

32mins ah Ronaldo chun Bale pass anthawk awlsam takin goal thun nawkin 1st half ah 3-0 in hma anṭhuoia, aggregate leh 4-0 in hma anṭhuoi. Bayern ta ding chun beisei an sang ta naw hle. 38mins ah Alonso chu Bastian Schweinsteiger lakah a foul leiin yellow card pek ani a, final ah a khel thei naw ding a nih. Hi hi inkhel sung po po a Real Madrid ta dinga chanchin ṭhanaw pawltak chu a nih.

2nd half hi ringlawk ang ngeiin 1st half angin hmunuom a um ta nawh a. Bayern hai khel dana an lung a hnuol deu tah niin an lang. Robben le Riberry haiin half chance anei an hmang ṭangkai thei nawa. Gotze khawmin chance ṭha a thel bawk. Hun tawptawm 89mins ah Ronaldo chun Bayern phurrik hung siem sain Champions League ah a goal 16 na dingin freekick anthawkin goal a thuna 4-0 in Real Madrid in hnena an chang.

Final ah Real Madrid vs Chelsea am Real vs Atletico Madrid i hmunuom lem?

Champions Legaue semi-final thlirlawkna

Real Madrid vs Bayern Munich “The European Classico”

Real Madrid hin attacking game an nei ṭha em em a, an nawr na thei em em a, goal khawm an thun thei hle. Amiruokchu an goal an insuo thut nuom hle a, an defence a det indo rak naw leiin attacking game nei ṭha ve tak Bayern Munich hai ta dingin advantage lak theina ṭha tak a nih. Bayern Munich vet hung hi an defence a a det indo thawkkhat a, champion lai an ni el bak a Bundesliga title an lak ta leiin domestic league tieng lungril pe rak ta loin champions league tieng hin lungril pe ta lem ngei an tih. Real Madrid ruok chu La Liga title inchuna tieng an la buoi ve em em a, Atletico Madrid le Barcelona hai hnuoia an um mek a, hi lei hin Bayern Munich chu an boruok a rik naw lem deu dingin an lang. Inkhel hma chu a hrat lem ding hril an tak a, Europe club a ropui pawl tak ve ve hai hi a tu lem am final May ni 24 a khel ding a hin an khel lem ding ti chu hril harsa tak el a nih. An game khel dan an ang ve em em a, ieng tak am aw an chang ding chu? Goal 14 thun a Champions League a goal thun rawn tak ni lai mek C.Ronaldo le a pawl hai hin German champion le Europe a champion ni lai mek Bayern Munich hai hi an hne ban thei i ring am?

Chelsea vs Atletico Madrid “ The clash of Defensive-Counter Attacking Masters”

Tuta season Champions League a goal insuo tlawm tak Atletico Madrid le English Premier league a defensive game inhnel  thiem pawl tak a ngai Chelsea hai inkhel ding hi en inhawi hle ding a ngai a nih. Defensive game an nei ṭha v eve a, counter attack an thiem ve ve bawk a, team an in balance tawk v eve bawk. Champions League a hin tawnhriet la hau lo tak Atletico Madrid hin 2012 lai a champion thei ngat Chelsea hi an ngam naw bik chie chu ring a um naw hle! Manager an nei ṭha ve ve a,  player ṭha an hau v eve bawk a, Chelsea striker haiin goal thun rawn bek naw hai sienkhawm a hun a chu an thun ve khuk nawk hlak bawk, Atletico tieng chu striker le midfield haiin goal an thun thei em em a, hrat lem  ding hriet a harsa em em! A tu tieng tieng khawm an game khel dan style hi an ang ve ve ti thei a nih. A hrat lem ding hril a harsa hle a, en naw dingin inpam a um hle bawk!

April ni 22 zan Chelsea le Atletico hin 1^st leg Spain khawpui Madrid a inkhel an ta, 2^nd leg chu London khawpui a khel nawk an tih. An khelmuol a ve ve an che ṭha ve ve bawk, away goal hau lem lem chu hrat ngei dingin ring an um. April ni 23 zan hin Bayern le Real hai hin 1^st leg Madrid khawpui a khel ve nawk an ta, 2^nd leg hi Germany khawpui Munich a khel vet hung nawk an tih. A hun tlung vat vat ta sien nuom a um ta bak el!

Atletico Madrid in Barcelona an petdawk, UCL semi final anin hlangkai

Champions League quarter final chu khelzo tah niin vawizan khan match hmunuom um tak tak ei hmu nawka. La Liga hmaţhuoi mektu Atletico Madrid chun Barcelona anlo mikhuola. Koke goal khat thun hmangin 1-0 in an hne a. 1st leg result leh 2-1 a hnein kum 1974 hnungah a vawikhatna dingin semi final anin hlangkai.

1st leg a khan Atletico thiempuipa Diego Costa chu an hliema, la damfel hman loin vawizan khan a khel thei nawa. Ana chu ama um naw khawmin Barca an dawngsawng thei hi mipakhatah cho anin nghat naw ti a sukchieng hle.

Tuta season fe mekah hin vawisari lai anin tawk ta a. Vawiruk in draw in vawikhat Atletico hai an hrat tah a nih. Inbei thei tak chu an ni hrim hrim. Mak takin Lionel Messi hin hieng an match haiah hin goal khat khawm a thun nawa. A zawnin Atletico lakah game 7 goal a thun ta nawh. Barcelona hi kum 2007 anthawk khan Champions League semi final an tlingzo naw vawikhatna a nih.

Inkhel an ţana, Atletico Madrid in bul anţan fu cher cher hle. 1st leg a khan Camp Nou ah 1-1 a anin draw lei khan 0-0 a in draw khawmin Atletico hi tlang ding tho an ni a. Ana chu goal venghim ringawt thaw lo a an nawr ve hi an thawfu hle niin an lang.

5mins ah Atletico chun goal an thun nghal. Andrian Lopez chu chance neiin post an dengtir a, hi rebound hi Barcelona player hlui David Villa chun la lapheiin Lopez a pek nawka. Ama hin Koke pein awlsam takin hnaite anthawk goal a thun.Atletico bawkin chance ţha tak tak an nei nawka. David Villa chun vawihni lai a post le a chungkhang an dengtir. Messi khawmin chance ţha vawikhat aneia chu a head out hlau.

Barcelona hin an thawdan pangai ang bawkin ball possession an hau nawk hle a. Ana chu chance thatak anin siem thei nawh.

2nd half a khawm Barcelona bawkin ball an changrawn lem nawka. Ana chu 1st leg an khan Courtios an sukbuoi thei tak tak nawh. Xavi chun chance ţha 2 vel anei a chu a hmang ţangkai thei nawh. Andrian Lopez chu Diego in a hung thlaka, a lut anthawk sawtnawte hnunga chance neiin a shot chu Barca keeper Pinto in ţha takin a lo save. Hun tawp tawma Neymar chun chance vawikhat aneia chu a head out.

Hi zo last minute ah Rodriguez chun Atletico ta dingin goal a thun teu hle a. Pinto bawkin a save hman hram. Huntawp zui nghalin Atletico chun Barcelona chu hnein Champions League semi final an lût.

Champion lai Bayern in United hnein semi-final an kai

UEFA Champions Legaue inkhel  fe mek a, ṭuarter final 2^nd leg inkhelna vawizan nei a nih a, Bayern Munich hai khelmuol a Manchester United le Bayern hai chu khu cham chamin hratna inchuin an innawrtuo a, hrat ngei tum ve ve in nasatakin an inbei.

David Moyes le a pawl hai hin 1^st leg a an khelmuol  Old Trafford a 1-1 in an inhnetawkpui ta a, Bayern haiin away goal pakhat an nei leiin hmangqangkai an tum nasa hle. Hi inkhel a hin 1^st half sung goal lut a um nawh a, khelmuol neitu Bayern haiin ball an chang rawn lem a, goal attempt chu an inzat ve zing tho.

Goal lut hai hi 2^nd half a lut vawng niin, goal hmasatak hi Manchester United left back Patrice Evra in minute 57 naa a thun a, United tiengin away goal an nei chu lawm taluoin, an ṭantu pawl an khek indur nasa hle! Away goal an nei chu an lawm suol deu am a ni ding, goal an thun zo minute hni a tling hman ṭawkin Mandžukić  chun Bayern hai goal bat hung thungrul ve nghalin, 1-1 in an inhnetawk a, aggregate a 2-2 niin away goal an nei inzat ta char a.

Mandžukić in goal a thun zo hin khelmuol neitu tieng an tha a hung tho nawk ṭan a, Bayern goal hnina chu T. Müller in minute 68 naa a hung thun nawk a, inkhel boruok a hung thlak danglam zat tah a nih. Champion ni lai ngei ngei chu, an hung phur ta tul tul a, Bayern hai chu Robben hmangin a goal thumna minute 76 naa an hung thun nawk a, 3-1 in hma an ṭhuoi a, hi zo hin goal lutsap um ta loin aggregate in  (1^st leg le 2^nd leg a goal belkhawm)  4-2 in hnena an chang ta a nih.

Pep Guardiola le a pawlhai chun David Moyes le a pawl hai chu hne banin, semi-final an lo kai tah a nih. Semi final a kai team hai chu Bayern Munich,  Real Madrid, Atletico Madrid le Chelsea hai an nih. Europe a top 5 league neitu rambung England, Spain, Germany, Italy le France club hai lai, Spain a La Liga a inthawk team pahni Madrid khawpui suok ve ve Atletico Madrid le Real Madrid an la um a, England a London Club kum 2012 lai a Champion lo ni tah Chelsea an la um a, Germany a tuta Champion ni lai mek Bayern Munich an la um bawk a nih. Semi final draw hi tuta thla ni 11 a nei ning a tih.

Full time

Bayern 3-1 Man. United
(Mandžukić 59 T. Müller 68' Robben 76
(Evra 57)
Agg: 4-2

Chelsea chun PSG lethalin Champions League semi final anin hlangkai.

Vawizan khan UCL quarter final hmunuom um takel ei hmu a. English club ţha Chelsea chun French club ţha Paris St-Germain an lo mikhuola. Hun tawp tawm a Demba Ba goal thun hmangin 2-0 in hnena an changa. Ropui takin Champions League semi final an lût. Kar hmasak khan hieng team pahni hai hi Paris khawpuiah 1st leg ah an loin nuoi tah a.

PSG hin 3-1 laiin Chelsea an lo sawpa. Hi lei hin PSG hai chance hi a ţha hle a. An ni hi mi tamtak khawmin semi final lut lem dinga an ring ania beisei khawm anum lem bawk. Beiseina insangtak leh Stamford Bridge an hung pana. Paris a Chelsea le Stamford Bridge a Chelsea chu an ang naw hle. Chelsea chu mi beisei phak baka khelţha in 2-0 in anlo hne a. Aggregate in 3-3 a in draw in, away goals rules hmangin Chelsea chu semi final an lut tah a nih.

Season hmasa khawm khan PSG hi quarter final ah away goals rules hmangin anlo tla tah. Inkhel anţana goal thun mamaw em em khawm chu goal 1 el cho nilo a tlawm takah goal 2 bek thun ngai Chelsea chun duthusamin bul an ţan nawh. Ana chu fimkhur takin in awi loin an nawr char char a. An game khel khawm a ţha hrat hle. An game a fuk ding cho leh beidawngna ding an nei nghal. 18mins ah an thiempuipa le PSG hai laktum nia hril Eden Hazard chu an hliem leiin Schurrle chun a hung thlaka. Hazard hin field a suoksanattouch line a aum lai PSG coach Laurent Blanc in alo chibai nghe nghe. Chelsea chun goal thun ngei tumin an nawr zinga. 28mins ah Lampard chun freekick anthawk goal a thun teu hle. PSG keeper in a lo save thei hram. 32 mins ah Chelsea chun goal an thun ta nghe nghe. Hazard thlaktu Schurrle chun goal thunin 1-0 in hma anţhuoi. Hi zo hin Verrati chun Schurrle box sunga a sukthlua? Ana chu referee in penalty a pek nawh. 1st half ah 1-0 in Chelsea chun hma anţhuoi. 2nd half a khawm Chelsea bawk an khelţha lema. PSG attacking ana naw hle a, Ibrahimovic um naw PSG hin an tuor hle niin an lang.

Chelsea chun nawr sunzawm zingin goal ruok chu an thun el thei ta bik nawh. Oscar le Schurrle bawkin chance ţha neiin goal post anin dengtira goal anthun sa teu hle. PSG ta dingin Levazzi le Cavani haiin chance an neia, ana chu Cech ta dingin a harsa lawm nawh. Chelsea chun substitution siemin Ba le Torres inlut tirin striker pathum anin lut tir a. Goal thun ngei an tum hle. PSG chun goal venghim tieng ngaipawimaw lem tain anin tawlkir ta hle. Theitawpa an nawr ra siekin 87 mins ah Demba Ba chun goal a hung thuna. Cesar Azpilicueta cross chu an lo dang per a, Ba hi hnaite anthawk goal a thun tah a nih. Hi zet hin chu Mourinho chevel hmunuom a um ie. Chelsea chun 2-0 in hma anthruoia. Hun tawp tawma Cavani le Marquinhos chun goal a thun teu hle. Hun tawpzui nghalin aggregate ah 3-3 a in hnetawkin Chelsea chun away goal rules hmangin UCL semi final anin hlangkai.

Game hrim hrim ei thlir a, Chelsea game a ţhain kawng iengkimah an chunghnung lema. PSG hin an nawr hlei thei naw ani tak. Midfield ah Luiz le Lampard inkawp khawm a fuk hle. A tawpna taka "the special one " tactic hi a lo puitak ma ma ni ie maw. . . .

Dortmund beiletna anthawk Real an him hram.

Vawizan khan Champions League quarter final match pui tak tak el pahni a um a. Inkhel pakhata lema Borussia Dotrtmund chun Real Madrid anlo mikhuola. 1st leg a hnena changzo loin 3-0 laia an tlawm hnungin huoisen takin an lo beileta 2-0 in an hne a. Sienkhawm Semi-final lûtna dingin a huntawk nawh. 1st leg le 2nd leg result belkhawmin Real Madrid hi 3-2 a hnena changin Champions League semi final anin hlângkai tah a nih.

Real in nghatna Ronaldo chu an hliem leiin a ţhang thei nawa. Ronaldo ţhanglona Real Madrid team hin beisei an phak naw hle a. Semi final an lût thei hi an vangnei takzet. Season hmasa khan hieng team pahni hai hi semi-final ah an loin bei tah a. Dortmund hin Real hnein final an lo kai ta a. Kha an hne naw kha tuta ţum chu phuba an lak ngei ring ani a. Ana chu beisei naw tieng thil a tlung teu hle. 1st leg ah 3-0 laia hmaţhuoi tu Real hi an hamhaiin an chebuoi han teu hle. Inkhel ţan ania. Beisei ang ngeiin team pahni anin nawr pawp pawp nghala. 17 mins ah Real chun hunţha neiin an bawpel. Fabio Coentrao cross chu Dortmund defender Lukasz Piszczek in a lo them (hand) a referee chu penalty a pek. Hi penalty hi Di Maria chun petin an tawlthlu a, Weidenfeller chun a lo save.

Hi zo 24mins ah Dotrtmund chun Marco Reus hmangin goal an thun. Pepe'n hnung tienga a head suol chu hmang ţangkaiin awlsam takin goal a thun. Dortmund bawk an chunghnung lem zinga. An nawr nasa in goal thun theina chance khawm an nei rawn pep pep hle. 37mins ah Reus bawkin goal a thun nawk. Reus hin midfiel ah ball la pheiin Lewandowski a pass a. Ama hin shot nghalin Casillas in lo them lietin post a fuin a hung rebound a. Hi rebound hi Marko Reus in goal ah a thun tah a nih. 1st half an meu chu 2-0 in Dortmund in hma anţhuoi. 2nd half anţana Real in bul an ţanţha hle. 49 minutes ah Bale chun chance ţhatak a neia Weidenfeller chun a ropui deuin a lo save a.

Hi zo khawm hin Benzema chance nei a goal ngei dinga inlang tah Hummels in line ah a petsuok hman. Anin khel sawt deu deua Dortmund bawk khelţha lemin chance khawm an hau nawk hle a. 65 mins a khawm a post anin deng tir a. Ana chu a pawimaw tak goal ruok chu an thun thei bik ta nawh. Hunin a dei tatnaw leiin 2-0 in inkhel tawpin Dortmund chun hnena an changa. Ana chu an goal thun belkhawmin 3-2 in Real Madrid an hrat lema. Champions League semi final anin hlângkai tah.

Ronaldo in Messi record a chen, Real Madrid in BVB an hne ban

Gareth Bale le Cristiano Ronaldo chun an goal thun ban thei loin Borussia Dortmund laka goal thun nawk v eve in Real Madrid chu vawi li a zawna Champions League semi-final kai thei ding ngirhmuna an hlang kai tah a nih. Hi inkhel a hi Santiago Bernebeu hmuna nei a nih a, khelmuol neitu tieng Real Madrid hai an huoisen hle a, season hmasa Mourinho rawia semi-final a an hne lo BVB hail aka phuba lak chu an tum inru hle a nih. Inkhel ṭan a ni chara inthawk minute 4-na chauin Gareth Bale chun goal mawi em em a thun nghal a, hi zo hin Malaga a inthawk a tuta season ṭan hmaa an inchawk Spain U-21 winger Isco chun minute 27 naa Real hai ta dinga goal hnina hung thun zawm nawkin, 1^st half a 2-0 in Real hin hma an ṭhuoi nghal.

2^nd half ṭan a ni a, inkhel boruok a lum pep pawp hle. Madrid fans haiin a ek rawng chena hriet an nuom hiel CR7 chun Champions League season khata goal 14 a thunna dingin minute 57 naa goal mawi em emin a thun a. CL season khata goal 14 thun thei umsun chu Messi le European Cup record holder José Altafini hai chau an nih. Goal 14 hi record ngir lai mek a nih a, chu chu khum khel thei ding ngirhmuna Roanaldo chu a ngir zing a nih.

Goal dang a lut sap ta nawh a, season hmasa a 2-0 a an hratna hmun a 3-0 in Real chun Dortmund laka hratna an lo chang nawk tah. Season hmasa a 4-1 laia an tlawmna hmun German a ieng tak am an hang chang ding ti chu chil put raka ngaituo tham a tling hle.

Full-time
Real Madrid 3-0 Borussia Dortmund
(Bale 3' Isco 27' Ronaldo 57')