Aletico Madrid in Spanish title an hnei mek

Vawizan khan Atletico Madrid in Gatafe 2-0 in anni khelmuol ah an va hne a. La liga title la thei dingin ngirhmun ṭha takah anin hlangkai. Zanizan Real Madrid an hrat laiin Barcelona an hratnaw thunga. Hmaṭhuoitu hai chu Madrid team hai pahni an ni tah a nih.

Atletico hin game 33 khel tah in points 82 an hmu tah a. Points 3 in hma anṭhuoi a. Real in dawtin game 33 ah points 79 an hmu a. Pathumna ah Barcelona umin game 33 ah points 78 an hmu ve tah bawk.

Hi match a hin Atletico thiempuipa le hliem damkawr Diego Costa le Godìn haiin goal an thuna. Ana chu Costa hi a goal thunna ah goal banah a ngalchâr an tet fu a, an thi zawi zawi a. Zawn suok nghal anih a. A hliem inrik hle dinga ring ani laiin ring nekin a lo nanaw lem hlau a, sawt a chawl a ngai naw ding thu Atletico Coach Diego Simeon chun a hril.

Inkhel an ṭana, a bultieng Atletico hi an khel buoi hle a. Gatafe haiin 19 minutes ah goal a thun vang nghe nghe. 28 minutes ah Godin in goal thun vangin a shot ṭhatak chu Gatafe keeper in a lo save. Tlawm tlawmin hungin siemṭhain 1st half tawptawm 40 mimutes ah Godìn chu head goal in Atletico chun 1-0 in hma anthuoi. 

2nd half bultieng khawm Gatafe an khelṭha hle a. Goal thuntheina chance khawm an nei nuol. Ana chu 64mins a hungin hersuoka red card le penalty an chawi. Lafita chun box sunga Miranda a pawt thlu a referee chun straight red card pein a hnawtsuoka. Penalty a pek bawk. Hi penalty hi Costa in petin Godina in alo save. Penalty a pet hma char hin Gatafe fans pakhatin goal hnung anthawk a mawng a lo hlîm khawm. Minute 84 a hungin hersuoka, Costa chun goal a thun ta tho tho. Adrian Lopez pass thatak anthawk Costa chun goal ah a pet luta. Ana chu goal bana ah a ngalchar a tet leiin zawnsuok a ngai hiel a nih. Atletico chun 2-0 a hnein La Liga ah points 3 in hma anṭhuoi mek.

Tuhin Champions League semi final anin hlangkai tah a. La Liga ah hma anṭhuoi mek bawka. Title pahni lathei dingin ngirhmun ṭhataka an ngir mek.

La Liga a manager inpakum, Diego Simeone

Pos	Team	P	GD	Pts
1	Atlético	32	48	79
2	Barça	32	66	78
3	Real Madrid	32	58	76

A chal ngen ṭhal intlansiekna a chu a pui inrai lai hai ta ding chun ṭhang ve dan hlawl a um naw chu ni mang a tih. La Liga title inchuna a chu team pathum Atletico de Madrid, FC Barcelona le Real Madrid CF hai chu nasatakin an inhnawt thlet thlut a. Pakhat tak chu title chu an lak ngei ding ti chu khawvel a la um a hun ala um ding a ni chun a chieng keng kawng hle a. Tua inkhel ding la um haia boruok suk lumtu ding tak chu inkhel tawpna tak a Atletico le Barca hai inkhel ding hi ni ngei tang a tih.

Hi club pathum hai hnuoi a um Athletic Club Bilbao hai chun  vawi 31 inkhel tain point 56 chau  an hmu a, palinaa um Real hai le an kar a point 20 lai a um a, phak dan a um ta naw tieng a nih a.

Real Madrid le Barcelona hai turu ziet chu hril taluo a ngai hranpa nawh a,  Atletico Madrid tieng hi hei thlur met ei tih. Atletico a zaia hung suk vultu an manager Diego Simeone hi Inter Milan a le Atletico Madrid a hin a lo khel ta hlak a. Ama hi La Liga sawkawr pahni inhnawtna an lo ti hlak kha pathum inhnawtna in a hung thlak danglam thei hi a turu hle a nih. Sergio Aguero, Diego Forlan rawi an khel lai vel khan Atletico chu a zaiin an hung invawr dawk pei a.

 Diego Sieone hin

Atlético Madrid

hi 23 December 2011 a inthawk a hung enkawl ṭan a,

, sienkhawm an player ṭha an inchawk pek pei hlak a. Anachu an vai bik nawh, a player neisa Radamel Falcao a hung suk vul ṭan a, season nawk miin an inchawk pek nawk a. Chu zo chun a striker neisa bawk Diego Costa chu a hung suk vul thar nawk a, Diego Costa hi inchaw pek nawk hai sien a dang hung sukvul nawk tan aw ni ti thei tu am ei um? Manager in an zir naw chun football khel mi hai hi an ni ding ang an ni thei ngai naw ti hretu seng ei nih. Entirna chu la hran da el ei tih, premier league tieng a ei unau hai lungril sukna pal hlau rawi ei tih.

An club budget le Real le Barca hai budget enkhi zing puma a trophy lakpui hai hi en chun a nep naw hle:-

• Copa del Rey (1): 2012–13
• UEFA Europa League (1): 2011–12
• UEFA Super Cup (1): 2012

Champions League a spanish club pathum hai hi an la um seng a, amiruokchu Barca le Atletico hai chu pakhat lem lem tla ding ngirhmuna an ngir mek a. Real Madrid chun an khingpui hai lak a rezal lawmum an nei leiin hadam takin tuolsung inelna tieng lungril an pek thei ngei khawm ring a um.

La Liga title sakawr pathum inhnawtna a hin a tlan hrat tak lawman dawngtu ding hi hril ngam khawm a la ni nawh a, Premier League le La Liga hi tukum chu a en anhawi chem chem hle a, entu hai mit khawm a tlai, season tawp tieng ei tlung ta mek a, Clun ṭha an invawr dawk mek a, club ṭha naw an tlusie mek bawk.

La Liga en suk hawitu hi Messi, Ronaldo, Costa, Neymar, Bale hai chau an ni nawh a, player pop o le manager hai pop o an um naw chung kawk a um naw ti hre zingin, manager ṭhenkhat inpak um em em Diego Simeone hai ang dam hi hrefu ve hlak ei tiu.

In lo hriet ta hlak am?

1.FC Barcelona in march ni 26, 2014 a Celta Vigo an hne kha kum 1929 kuma La Liga inṭana inthawk vawi 1000 an khelmuola hratna an changna char a nih.

2. Europa League 2005/06 final a Shakter Donetsk le Rapid Bucuresti in final an khel ṭuma club pahni hai coach kha pa fa an nih. Mircea Lucesu chun a pa Razvan Lucesu club enkawl chu hnebanin Shakhtar Donetsk chu hratna a changpui a, inkhel zo press conference a khan apa chun a naupa cu lawman mitthli le a fawp ngawi ngawi hiel a nih.

3. England mihrang Peter Shilton chu goalkeeper lai popo a inkhel rawn tak niin vawi 1005 an khel a nih.

4. March ni 25, 2014 a Manchester derby a Rooney an khel kha vawi 600 inkhela a ṭhangna char a nih. Kha inkhel a Edin Dzeko in inkhel sung second  44 chau a nia goal a thun kha Manchester derby goal lut inrang tak record a nih.

5.Champions League final a Red Card hmu hmasatak chu Arsenal keeper hlui  Jens Lehmann kha a nih. 2005/06 Season final a Barcelona le Arsenal inkhel a Red Card a hmu kha final a red card hmu hmasatak a ni ṭum a nih.

6. Lionel Messi hin el classic goal 21 a thun tah a, Real Madrid hai home a vawi 12 a thun tah a, an ni khelmuol a vawi 9 a thun ta bawk.

7. Real Madrid hi Champions league a azawna game vawi 33 goal thun zie thei hmasatak an nih.

8. Manchester United hin season hmasa pathum liemta haia an khelmuola an hratnaw po belkhawm nekin tuta season a an hratnaw hi a tam lem. (5>4)

9. Tuta season Andrea Pirlo in Juventus ta dinga goal 5 a thun hai hi free kicka inthawk  ngawta a thun a nih.

10. Arsenal le Real Madrid chau hi 2003/04 season a inthawk a season tin Champions League knock-out stage kai thei an um.

11. Champions League history a a vawikhatna dingin tuta season a  group tina hmaṭhuoitu po chu quarter final an kai seng.

12. Champions League a game 7 inzawm zara goal thun thei umsun chu C.Ronaldo chau hi a la nih.

13. Man City in Champions League history a hratna an lo chang tahai po belkhawm nekin David Moyes hin tuta season Man Utd manager a ni hin Man Utd hratna a changpui zat a tam lem.

14. Chelsea hin premier league a vawi 127 lai zet 3-0 a hma an ṭhuoi hmasa tah a, chulai chun vawikhat char an hum zo nawh a, chu ṭum chu Feb 2012 a Manchester United le 3-3 a an in draw kha a nih.

15.Tuta ṭuma champions league a inkhel thei a naupangtak chu  Arsenal player Gedion Zelalem ( kum 17, dob-26,jan 1997) a nih a, a upatak chu Chelsea keeper Mark Schwarzer (kum 41, dob- oct, 6, 1972) a nih.

Barca, Atletico an hrat laiin Real in hnena an changzo nawh.

Vawizan khan La Liga top 3 haiin match an nei senga. Barcelona le Atletico Madrid haiin an khelpui hai an hne ve ve laiin Real Madrid chun hnena an changzo nawa. Champion an tumna kawnga harsatna nasatak an tuok tah.

La Liga hmaţhuoitu Atletico Madrid chun Granada anlo mikhuola. An striker suongvawr tulaia goal thunthei em em Diego Costa chun goal khat thunin hnena an chang. Costa hin 1st half 30mins ah goal umsun hi corner anthawk a head lut.Diego Costa hin tuta season ah La Liga bikah goal 24 a thun tah. Atletico hin game 30 khel tain points 73 an hmu ta a. Hma anţhuoi mek.

#Barcelona chun Celta Vigo anlo mikhuola. Harsa lo takin 3-0 a hnein La Liga ah Real Madrid lepelin pahninah anin hlangkai.

Hi match a hin tulaia sawisel hlaw dinga mi hmur chunga chuong met met tah Neymar chun 6mins le 67mins haia goal a thuna. Anin nghatna Messi chun 30mins ah goal khat a thun bawk.

Barcelona hin game 30 khel tain pahnina ah an uma, pakhatna Atletico chu point 1 in anla phak nawh.

#Real Madrid chun Sevilla khelmuola an vân zina, ringlo takin hnena an changzo nawh.

Hi match a hin Real Madrid thiempuipa Cristiano Ronaldo chun match ţan ani anthawk 14mins ah freekick anthawk goal a thuna. A freekick pet hi anlo dang pleu. Hi zo 19mins ah Bacca chun an bat hung rulin 1st half ah 1-1 in anin draw.

2nd half 72mins ah Bacca bawkin goal hung thun nawkin hi goal hi khelmuol neitu Sevilla in an hratpui tah a nih. Game hrim hrim hi chu Real in an thuhne hle a. Chance khawm an hau hle. Ronaldo khawmin post an dengtir bawk. Ana chu a pawimawtak goal anthun thei thlawt nawh. Tuhin Real hin game 30 khel ve tain pathumna ah an uma, points 70 an hmu mek.

Sevilla goal thuntu Bacca hi bus conductor hlui a nih.

Barcelona chun Real Madrid hnein Messi'n hat-trick a siem.

Vawizan zanrila lai khan El Clasico game hmunuom um tak ei hmu a. Santiago Bernabeu ah La Liga match pawimaw takah Real Madrid chun Barcelona anlo mikhuola. Mikhuol team Barcelona chun khelmuol neitu Real chu 4-3 in an hne a. Title an beiseina chu sukthara umin an chunga um Real le Atletico hai chu point 1 charin an phak ta nawh. Tuhin game 29 seng an khel ta in Barca hin points 69 an hmu ta a. Hmathuoitu Atletico le Real hin points 70 ve ve an hmu tah.

LINES UP:
BARCELONA»
Valdes, Alves, Pique, Mascherano, Jordi Alba, Sergio, Xavi, Iniesta, Cesc, Messi, Neymar

Subs: Pinto, Pedro, Alexis, Adriano, Sergi Roberto, Bartra, Song

REAL MADRID» Diego Lopez, Carvajal, Pepe, Ramos, Marcelo, Xabi Alonso, Modric, Di Maria, Cristiano Ronaldo, Benzema, Bale

Subs: Casillas, Varane, Coentrao, Nacho, Morata, Isco, Illarra

Hi match hi sawisel thei ding a tam hle a. Penalty pathum hai Ramos red card hai kha sawisel theitak chu an nih. Inkhel ţan ani le inruolin players hai an pu nasa nghala anin nawr nasa hle. 7mins ah Messi chu Ineista chu box sunga ţhatakin a pass a. Ama hin shot nghalin net chung pawng zawtin a goal chieng hle. Real in hung nawr ve nghalin chance khawm an neiţha thei hle. A bikin Di Maria a khelţha takzet. 20mins ah Benzema chun Di Maria cross tha taluo anthawk nal takin a head goal a. Hi zo 24mins ah Di Maria cross anthawk bawkin Benzema chun box sunga chieng takin a pet goal nawka. Real chun 2-1 in hma anthuoi. Hi goal thuntu Benzema ball lakthlak le a finishing kha chu a turu nih. Hi zo hin Real an phur thar hle a, nawr khawm an nawr nasa hle. Benzema hin hat-trick siemtheina huntha a nei rawn hle a chu a pet goal thei ta nawh. A chance tha a lost zo zai hai kha chu inpam um tak chu an nih.

Barca khawmin hung nawr vein Messi'n chance ţhatak a ţhela. 1st half tawp tawm 42mins ah Messi bawkin box sung incheptak kara goal thua 2-2 in anin draw. Khang ang goal kha chu Messi naw chun thunthiem ding chi an nawh. 1st half ah 2-2 in anin draw.

2nd half anţana Real an khelţha in Barca an nawr nasa hle a. Game khawm an rang hle. Ronaldo chun ball tlanlut puiin box lai Dani Alves chu a kar thlu a. Referee chu foul lain penalty a peka. Replay anthawka anlang dan chun Alves in Ronaldo a karthlukna hi penalty box line puo char niin an lang. Hi penalty anthawk hin Ronaldo chun goal thunin 3-2 in Real chun hma anthuoi nawk tah.

Goal batlem Barca game a hung ţha ţana, goal thun ngei tumin an nawr ve nghala. Chance khawm an nei ve zeu zeu. 63mins ah Messi chun Neymar chu a pass a. Real defender hai kara ball tlanlut puiin keeper cho a um tah ti a, hnungtieng anthawk Ramos chu a hung karthlua? Referee chun foul lain penalty a peka. Ramos chu direct red card pein a hnawtsuok. Hi khawm hi replay anthawka an lang dan chun Ramos le Neymar kha contact chu a um meta chu Neymar kha a tlu nuom taluo met niin an lang. Penalty anthawk Messi bawkin goal hung thunin 3-3 in anin draw.

Kimlo a khel Real ta dingin nawr ngaina a um ta nawa. Barca bawkin ball possession hau lemin an nawr nasa ve ta hle. Ana chu goal an thun el thei bik nawh. 84mins ah Iniesta chun Real penalty box sunga a tlanlutpui a. Alonso le Carvajal hai kara tlanthleng a tum laitak Alonso chu hung karthlu in referee chu penalty a pek. Hi khawm goal thun ngei ngei nah an naw leiin, penalty em em chu in ti ve naw maw. . . Penalty anthawk Messi chun goal thun nawkin hat-trick a siema. Barca chun 4-3 in Real lakah hnena an chang. Messi hi El Classico ah goal thunrawn tak ni tain goal 21 a thun tah.

Real Madrid chun Levante hnein La Liga hmaţhuoitu an ni tah.

Pathienni zan khan Real Madrid chun Santiago Bernabéu ah Levante an lo mikhuola. 3-0 a hnein La Liga hmaţhuoitu an ni tah. Inrinni zan khan anin elpui hai pahni Atletico le Barca haiin matchan nei ve ve a. Beisei lo takin Barca hin anin khelpui Real Valladolid an hne nawa. Hi lei hin an kara points 4 lai a um ta a nih. Pahnina Atletico le an kara hin points thum a um bawk. 1st half a hin goal khat a luta. Inkhel ţan anthawk 11mins ah Ronaldo chun Di Maria corner pet anthawkin mawi takin a head goal. Goal dang lut ta loin 1st half a tawp. 2nd half an ţana 49mins ah Real ta dingin Marcelo chun goal hung thun nawkin 2-0 in hma anţhuoi. Hi zo 64mins ah Levante player Navaroo chun hnungtieng anthawk Ronaldo chu a karthlu a, red card peka hnawtsuok a nih. Real chun nawr sunzawm zingin 81mins ah Nikos Karabelas chun anni tieng goal thun palin Real chun 3-0 in hnena changin La Liga ah hma anţhuoi tah.

La Liga hmathuoitu thar Atletico. Barca anin tawlthlu.

Tuta season chu beisei phak bakin Atletico hai an hung che thra a. La Liga title race khawm nidang anlo takin hmunuom a um tah. Atletico Madrid chun 2nd half a David Villa goal 2 thun hmangin Celta Vigo 2-0 a hnein La Liga hmathuoitu thar an ni tah.

Hi match a hin Atletico superstar Diego Costa chu hrem ani leiin a khel thei naw a. David Villa chun a thaw ai thawin goal 2 zet a thun. 1st half a hin Atletico hin nawr vieu hai sienkhawm goal anthun thei naw hle. Celta Vigo keeper in a save tha thei hle.

2nd half a khawm goal an thun el thei nawa. 62mins ah Celta defender hai thawsuol zarzoin Villa chun goal a thuna. Hi zo 64mins ah thun nawkin 2-0 in hma anthuoia. Hieng goal 2 hai hi an hratpui ta a nih. Tuhin Real le an point hmuzat an ang chara vawizan Real in Levante an hne chun Real hin hmathuoi nawk an tih.

****

Barcelona chun Real Volladolid 1-0 a hne loin La Liga title race ah anin tawlthlu a. Title inchuna chu anni kuta innghat an ta naw a. Title la ding chun midang zarzo a ngai tah.

Hi match a hin Barca hin inkhel thunin possession hau lem hai sienkhawm an game a dul tluonsuok zaka. Nidang an phak naw hle. An chance thra an hmangtrangkai thei nawh. 17mins ah Rossi chun Real Valladolid ta dingin goal umsun hung thunin hi goal hi an hrat pui ta a nih. Barca hi tuhin pathumnaah umin vawizan Real an hrat chun anin kara points 4 lai um tang a tih.

Carles Puyol chun season tawpah Barcelona a suoksan ta ding.

Barcelona captain Carles Puyol chun tuta season fe mek tawpah hin Barcelona a suoksan ta ding thu a puonglan. Puyol hin Barca ah kum 2016 chen contract anei a chu ama le club hi inbie remin a contract hi an suktawi ta a nih. Puyol hi kum 35 mi ni ta in Kum 1999 khan Barcelona ta dingin a debut game a khela. Tuhin game 400 lai a khel ta a. Barcelona players pawimaw pawltak hung niin, Barca hlawtlingna kawnga khawm a thawhlawk pawltak a nih. A ram Spain ta ding khawmin a ţangkai hle a. Game 100 lai khel ta in. Euro 2008 le World Cup 2010 Spain in an lakna kawnga khawm a thawhlawk hle. Sienkhawm kum leimta haia khan inhliem in a hung tlakbuok ve a. Tuta season lem chu Barca ta dingin game 12 char ala khel. Hi chungchang hi Puyol chun hrilin " Season tawpa chu Barcelona player ka ni tanaw ding a nih. Vawihni lai operation ka nei zo hnung hin, hi taka khel sunzawm pei ding hin ka beisei ang ka khel ţha thei ta nawa. Chu leiin hi thutlukna hi siem a ngai ta a nih. Season tawp hmain thla thum lai ala uma, theitawp suo ka tum. June 30 hnunga iem ka thaw ding ti ka la hriet nawa. Ana chu la chawlhadam ka tih. Kum 19 lai hi club a hin ka um ta a, season tawpa chu press conference hai neiin in mangţhatna hun hai ţhataka nei ka nuom" tiin a hril. PUYOL IN NUMBERS AT BARCELONA» Debut: 1999 La Liga appearances: 284 Goals: 11 Honours: La Liga (6), Copa del Rey (2), Champions League (3), Super Cup (2), Club World Cup (2)