DINTHAR FC-IN MANIPUR PLAYER ṬHA CLEAVEN HMAR AN LAKLUT

HMAR FC ta ding a lo khel ta hlak Cleaven Hmar chu Mizoram Premier League champion lai Dinthar FC chun Manipur League insangtak United Sports Association a inthawkin MPL Phase 2 ah dingin Feb 15 khan an laklut.

Cleaven Hmar hi Dr.T AO Trophy kum liemta ah Meghalaya-a nei a ni trum khan Manipur Champion na kawnga player pawimawtak anih, tuta NE Zone Santosh ah khan player hai an inpuocha lai velin a inhliem leiin Manipur tadi'n a khel thei ta naw anih.

Dinthar FC Boss Pu Bahluna chun,"Kan lawm hle ani" tiin a hril. Player thratak kan laklut thei hi kan lawma, ama hin kan team hi a sukhrat sawt kan beiseia, ropui taka a hungin lang ngei kan ring anih. Kan mamawtak player kan lak niin kan in hriet, keini lai hun in hawitak le ditumtak a hmang ngei kan beisei a tih.

Liverpool chun Norwich hnein Premier League title an hnei ta hle

Liverpool chun Carrow Road ah Norwich City chu 3-2 a hnein Premier League title an hnei ta hle a. Game 4 char khel ding an nei tah a, points 5 in hma anṭhuoi fal mek.

Hieng game 4 haia hin hnena an chang vawng chun Premier League champion an ni tah ding a nih. Game 34 ah Points 77 zet an hmu ta lei hin an hnuoi taka pathumna bek an ni tah hrim hrima, hi lei hin season tharah Champions League khel dingin an tling der ta bawk. Hi match ah hnena an chang nawk lei hin a zawnin Premier League ah game 11 lai an hrat zawm tain Club record ani nghe nghe.

Liverpool chu 3-2 in hnena an changa Sterling in goal 2 a thuna, Suarez in goal khat a thun bawk. Norwich ta dingin Hooper le Snodgrass haiin goal khat ve vein an thun.

Inkhel anṭana 4mins ah Sterling chun box buo char anthawkin mawitakin goal a thuna, Liverpool chu hma anṭhuoi nghal. Liverpool bawkin game an thununa 11mins ah Sterling pass ṭhatak anthawkin Suarez chun awlsam takin goal thun nawkin 2-0 in hma anṭhuoi. 1st half ah Liverpool chun 2-0 in hma anṭhuoi.

2nd half anṭana, khelmuol neitu Norwich an khelṭha lema. 54mins ah Hooper chun hnaite anthawk goal thunin an goal bat pakhat a hung rul. Hi zo sawtnawte hnunga Liverpool bawkin Sterling hmangin goal an thun bel a 3-1 in Liverpool chun hma anṭhuoi. 77mins ah Snodgras chun a head luta score line 3-2 niin Norwich an phur thar hle. Goal thun ngei tumin thei tawpin an nawr a chance khawm an nei zeu zeu a chu goal an thun thei ta nawh. Hun tawp tawmin Van Wolfswinkel chun Norwich ta dingin goal a thun teu hle. Hunin a dei ta naw leiin Liverpool chu 3-2 a hratin hnena hlutak an chang.

African ka ni leiin theinghilin ka um - Yaya Toure

Manchester City midfielder Yaya Toure chun Africa mi ani leiin khawvela Footballer ropui pawl taka ngai ani ve naw thu a hril. Ivory Coast international player hin England, Spain le Greece League ah hai a Club chu a lo Champion pui tah a. Barcelona chu Champions League ah a champion pui tah bawk. Tuhin PFA Player of the Year short list ah a um mek bawk. Tukum March thla a League Cup an lakzo hlim khan a teammates Nasri chun Yaya hi African player ni naw sien chu khawvela midfielder ṭhataka ngai ani ding thu a lo hril ta bawk. BBC’s Football Focus in an interview na ah Yaya chun " Nasri thil hril kha andik hle ni'n ka hriet. Diktak chun Hriet ei hlaw na chu fans anthawk a nih." "Africa ram khawlai hmunah khawm fe inla Messi chu hrievawng an tih. Ana chu Europe ah chu mi'n tum ani Yaya Toure chu? Ting an tih. A ṭhen chun ka hming hrieng ka hmel ruok chu hrie naw ni hai. Messi chu khawlai hmuna khawm hrie vawng an tih." "African ka ni hi ka uongpui takzeta. Africa mipui hai hi sanhima khawvel hrietah Europe le South America hai ang thoin African Players hai khawm hi an ṭha ani ti hi ka pholang nuom a nih." tiin a hril. Yaya Toure hi African Player ani lei hin enhranna a tuok niin i hriet am?

Real chun Barcelona hnein Copa del Ray ah an Champion; goal ropui thuntu Gareth Bale

Copa del Ray final Estadio de Mestalla — Valencia hmunah khel niin Real Madrid chun Barcelona chu 2-1 a hnein tuta season ah Cup hmasatak lain an Champion tah. Hi match a hin Real ta dingin Di Maria le Gareth Bale chun goal an thuna. Barcelona ta dingin Marc Bartra chun goal khat a thun ve bawk.

Real Madrid (4-3-3):
Casillas; Carvajal, Pepe, Ramos, Coentrao; Xabi Alonso, Modric, Di Maria; Isco, Bale; Benzema.

Barcelona (4-3-3):
Pinto; Alves, Mascherano, Bartra, Alba; Xavi, Busquets, Iniesta; Neymar, Messi, Fabregas.

Hi result lei hin Barcelona chu ni 7 sung vawithum lai hnebanin an um tah a. A hmasataka Champions League ah Atletico Madrid chun Aggregate ah 2-1 a hnein quarter final anthawk an pet dawka. Saturday khan La Liga ah Granada chu 1-0 in an hne nawa. Tuata season Trophy pakhat khawm chawi loin an um ding khawm a ang ta hle a. An coach Gerardo Martino chunga a pressure a nasa ta hle bawk.

Real Madrid thiempuipa Ronaldo chu an hliem leiin a khel thei nawa. Ronaldo umlo na Real Madrid mamaw phuhruktu chu khawvela player manto tak Gareth Bale a nih. Bale hi Real Madrid ah a lut anthawk game pawimaw a hai a khelṭha bek ngainaw lei hin sawiselna a tuok zeu zeu tah a. Vawisan khawm a chunga mawphurna nasatak an nghata. A mawphurna ṭha taka a hung hlên zo thei hin a class insangzie a pholang chieng hle. El Classico hi chu ieng competition khawm nisien a boruok an sang vawnga. Vawizan khawm mipui an phurin a boruok ansang hle.

Game an ṭan a, ringlawk ang ngeiin boruok an sang hle. 3mins na ah Isco chu Neymar a foul khun leiin yellow card pek nghal ania. Madrid chun nawr zui nghalin Bale in chance a nei nghal. 11mins ah Real chun Di Maria hmangin hma anṭhuoi. Di Maria hi a vawitieng sir anthawk ball tlanlut puiin Jordi Alba kalakkar ah petin Barca keeper Pinto ta dingin dang ngaina a um nawh. Real chun 1-0 in hma anṭhuoi. Barca chun nawr let tumin ball in pass kuolin an beia chu goal chance an neithei naw hle a. 1st half tawp tawmin vawikhat an nei hram. 1st half ah 1-0 in Real chun hma anṭhuoi.

2nd half bultieng Real hin chance an nei nawk nuol a chu goal an thun el thei bik ta naw a. 68mins ah Xavi corner pet ṭhatak anthawkin Marc Bartra chun mawi takin a head goal a, Barca chun an bat rulin 1-1 in anin hnetawk. Hi zo hin Barca bawkin ball chang rawn lemin goal thun tumin an nawr zinga. Ana chu Real hin counter attack anthawk goal an thunteu thei hle. 81mins ah Modric chun a post an dengtir nghe nghe. Hun tawp a hnei deu deu a 85mins a hungin hersuok meu chu Gareth Bale sho ropui tak ei hmu.

Bale goal thun dan

Fabio Coentrao chun Bale ball pein ama hin field chenve anthawk ball a khala Marc Bartra chu harsa lo taka tlan pelin cool deuin goal ah a pet goal a. 2-1 in Real chun hma anṭhuoi nawk. Bale hin field chenve anthawk ball a khan ṭan a nih.

Barca chun an bat rul theina hunṭha an la neia. Hun tawptawm ah Neymar chun chance ṭha deu neiin hau takin a ṭhel. Messi le Neymar an kheltha naw hle bawk. Madrid chun hnena changin Copa del Ray ah an Champion tah.