Manchester City chu Wigan in FA Cup anthawk an petsuok.

Manchester City 1-2 Wigan Athletic (Nasri 68') (Jordi Gómez 27'(pen) Perch 47' ). FA Cup quarter final nuhnung taka Manchester City chun champion lai Wigan Athletic chu Etihad Stadium ah phuba lak tum ngeiin anlo mikhuola. Beisei lo takin Wigan hin 2-1 a hnein semi final anin hlangkai. Wigan Athletic hin a zawnin a vawihnina dingin FA Cup ah Manchester City hi an hne ta a. Nikum khan FA Cup final ah 1-0 in an lo hne ta a nih. Hi lei hin City chun hne tum ngeiin an lo mikhuol a. Sienkhawm antum naw angtakin Wigan hin an hne lem ta a nih. Inkhel an ţana City chun possession hau lemin an nawr nghala chu goal chance an nei el thei bik nawh. Wigan chun counter attack a in nghatin City an nawr ve zinga. 27mins ah Wigan chun penalty anthawk goal an thun. Demichelis chun box sunga Fortunes chu sukthlu in penalty a chawia. Hi penalty hi Jordi Gomez chun chieng takin goal ah a thun. 1st half ah Wigan chun 1-0 in hma anţhuoi. 2nd half an ţana Wigan chun 47mins ah Perch hmangin goal anthun nawka. 2-0 in hma anţhuoi der. City chun substitution vawikhatin pathum an siema. Silva, Dzeko le Milner hai chu lutin an goal nawr khawm ana sawt. Clichy cross Dzeko a lo head chun post a fuk hlau. 68mins ah Nasri chun an bat zatve rulna dingin goal khat a hung thun a. City chun thei tawpin an nawr sunzawm zinga chance khawm an hau hle. Goal ruok chu an thun thei ta bik nawh. Hunin a dei ta naw leiin Champion lai Wigan chun 2-1 a City hnein FA Cup semi final an lut a. Semifinal a hin Arsenal le inkhel an tih.