Bayern le Atletico hai chu UCL Quarter final anin hlangkai

Arsenal ta di'n draw in umzie a nei zo nawh. FC Bayern München haiin Emirates stadium a 2-0 laiin an hne ta leiin Arsenal chun season hmasa a 3-3 a aggreagate a an inhnetawpkpui, away goal dan lei chau a an hne naw FC Bayern München bawk chu hnenaw nawkin Champions League last 16 ah an tla tah a nih. Hi inkhel a hin Pep Guardiola thluok an lang hle a, Bavarians haiin goal an insuo naw phawt chun ruond nawka an inhlangkai ding ti a hriet leiin possession tam lem nei thei dan ding takin players a remkhawm a. Ball chelding thiem em em Spain midfielder Javi Martínez, passing master Thiago Alcántara le German midfield suong tawlawi tawnhriet hau tawk tak el Bastian Schweinsteiger hai chu midfield ah siein, ball chang rawn dan dingin tactic a phan diem a. First half sung chu goal lut um chuong loin, ditkhawp umlo takin a tawp a. 2nd half a hin Bastian Schweinsteiger chun minute 54 naa goal a hung thun ta nghe nghe nghe a. Minute tam a liem hmain Bayern player hlui Lukas Podolski chun an goal bat a hung thunrul ve nghal a. Hun tawp chenin goal dang a lut sap ta nawh a. Thomas Müller in penalty a thun naw a chu Bayern ta dingin a pawi sei chuong ta nawh a nih. Arsenal ta dingin Cazorla le Giruod haiin an thun teu hle a, Bayern ta ding khawm a Mario Götze, David Alaba, Robben Mario Mandžukić haiin an thun teu ve hle... Bayern Munich hai chun Arsenal chu aggregate in 3-1 in an lo hne tah a nih. Bayern Munich 1-1 Arsenal Scorers:- (Schweinsteiger54′) (Podolski 57′) Goal belkhawm : Bayern Munich 3-1 Arsenal. ***** Club Atlético de Madrid kum 17 hnunga a vawikhatna di'n Quater Final an lut AC Milan chu awlsam taka an khelmuola hnein kum 1997 hnunga a vawikhatna dingin Club Atlético de Madrid chun UEFA Champions League quarter-final an kai tah. 1st leg ah Milan hai khelmuol a goal lut sun thuntu Diego Costa chun 2nd leg a hin goal hni a thun nawk nghe nghe. Khelmuol neitu Atletico Madrid hai hin khuolmuola goal khat an neisa a ni leiin a var zang pek hle a, chu naw el bak a European competition a hin an khelmuol a vawi 16 inkhelnaa vawi 15 hratna an chang thei ngat a ni leiin huoisenna le inringzona lientak an nei bawk a, inkhel tran charin khel turu tran nghal a, minute thumna a chun Michael Essien thawsuol chu Gabi'n lain mawitakin Koke a pass a, Koke chun goal a shot nghal chu dangin aum a, ball invawr thrat lai tak chu Diego Costa chun Shaolin Soccer takin a vuonga, goal ah inkhang pamin a thun a, muolneitu'n goal khatin hma an thruoi nghal. Milan tieng an inthlada bik nawh a, minute 27 naa Kaka chun an goal bat a hung rul ve nghal a. First half tawp tawm phetin Turan chun Rojiblancos ta dingin goal thun nawkin, Atletico Madrid chun 2-1 in hma an thruoi nawk. 2nd half a hin Milan haiin an tha an inthlada ta hle a, 1st le 2nd leg a goal belkhawmin 3-1 lai a ni ta leiin, goal hni dang thunsa an hawphur el khel a muolneitu tiengin an nawr nasa ngang el bawk. Milan tha inthlada chu chance a lain muolneitu tiengin an nawr ta zek a, Rual Garcia chun minute 70 naa goal dang a thunsa a, Diego Costa chun minute 85 naa hung zawmin, muolneitu tieng chun 4-1 in hratna an chang tah a nih. Atletico Madrid 4-1 Milan Scorers( Diego Costa 3′, 85′ , Turan 40′, Raúl García 70′) (Kaka 27') Goal belkhawm : Atletico Madrid 5-1 AC Milan